Pas e Mazgaan Huzzori

Pas-e-mizhgan huzoori ki duayen raqs karti hain Duroodon ki lahu mein fakhtayen raqs karti hain

Main jab ashkon se likhta hoon areezah un ki khidmat mein Waraq ko choom kar bheegi hawayen raqs karti hain

Hisar-e-aarzoo mein shaam hote hi tadapta hoon Charagh-e-deeda-e-tar mein wafayen raqs karti hain

Naha jaata hai har harf-e-dua rehmat ki baarish mein Nabi ke haath mein aa kar atayen raqs karti hain

Lutate hain sakha ki rim jhimain woh dono hathon se Baharen to baharen hain, khazayen bhi raqs karti hain

Get Lyrics On-The-Go! Download Our App Now!

Utarte hain farishtay jaam le kar aab-e-Kausar ke Dar-e-aali pe jab tishna nidayen raqs karti hain

Madine ke gali koochon mein jab milta hai bin maange Sar-e-darbar jhuk jhuk kar sadayen raqs karti hain