Meesaq e Ishq Ka Hai Waseeqa Bhi Roshni

Misaq-e-ishq ka hai wasiqa bhi roshni Nutq-e-sana ka lehja-e-yakta bhi roshni

Shahr-e-Nabi ﷺ to shahr-e-Nabi ﷺ hai, mere rafiq Shahr-e-Nabi ﷺ ka sirf hawala bhi roshni

Shahr-e-Huzoor ﷺ ka hai tasawwur bhi chand raat Shahr-e-Huzoor ﷺ ki hai tamanna bhi roshni

Taiba mein khelte hue bacchon ke hath mein Chhoti si ek kanch ki gudiya bhi roshni

Jis par likhunga ism-e-girami Huzoor ﷺ ka Woh takhti-e-shaoor ka hissa bhi roshni

Mamoor thi Khuda ki taraf se jo, Ya Nabi ﷺ Woh khush naseeb Aap ﷺ ki naqa bhi roshni

Never Be Without Your Favorite Lyrics - Get the App for Offline Access!

Jis ko saba lapet ke aanchal mein layi hai Shahr-e-khunak! woh tera bulawa bhi roshni

Tauseef-e-Mustafa ﷺ ki kitab-e-sukhan hai noor Loh-e-sana ke lafz ka nuqta bhi roshni

Jo roshni faseel hai shahr-e-Huzoor ﷺ ki Us roshni ko dekhne wala bhi roshni

Naqsh-e-kaff-e-Nabi ﷺ ki talash-e-azeem mein Main kho gaya hoon jis mein woh sehra bhi roshni

Loh-o-qalam bhi noor ke pairahanon mein hain Har lafz ke hai sar ka amama bhi roshni

Naat-e-Huzoor ﷺ chashma-e-anwar hai magar Hai lafz lafz naat ka tanha bhi roshni

Jis mein mera qalam bhi manata hai raat jage Woh jhoomti faza-e-jadeeda bhi roshni

Rehti hai har ghadi dar-e-aqdas ke aas paas Kilk-e-Riazؔ ka hai naseeba bhi roshni