Main Khud Bhi, Kalam Bhi Mera

Main khud bhi, qalam bhi mera, anwar mein gum hain Tayyaba ke khunak se dar-o-deewar mein gum hain

Jitne bhi takhayyul ke parindey thay fiza mein Tauseef-e-Payambar ﷺ ke chaman-zaar mein gum hain

Khushboo hai duroodon ki mere ghar ka muqaddar Aaqa ji ﷺ, kaneezein shab-e-bedaar mein gum hain

Shayaan-e-Nabi ﷺ sher koi ho nahi paaya Midhat ke mazaameen lab-e-izhaar mein gum hain

Ab kilk-e-sana noor bhare lafz samete Anwar-e-maani mere afkaar mein gum hain

Free Up Space - Get Lyrics Without Bulky Screenshots!

Aaqa ﷺ ke shab-o-roz ke maktab mein parha hai Khursheed-e-amal sair-o-kirdaar mein gum hain

Bachcho! dam-e-rukhsat mere, kehna yeh ajal hai Abbu to abhi midhat-e-Sarkar ﷺ mein gum hain

Tasveer bari Gumbad-e-Khizra ki chupi hai So aankhein sabhi aaj ke akhbaar mein gum hain

Maangoon dar-e-Aaqa ﷺ pe main kya? hosh nahi hai Ahdaaf-e-talab garmi-e-bazaar mein gum hain

Mahshar ki ghari sar pe khari hai sar-e-maqtal Hum log magar jubba-o-dastaar mein gum hain

Chamke meri qismat ka sitara bhi kisi shab Aankhon ke diye hasrat-e-deedar mein gum hain

Kashti meri be-samt rawan hai, mere Aaqa ﷺ Umeed ke saahil abhi manjdhaar mein gum hain

Hain naqsh-e-kaf-e-paaye Nabi ﷺ ke mutalashi Yeh arz-o-sama Sayyid-e-Abraar ﷺ mein gum hain

Quran ke samundar mein utarte hi nahi hain Arbaab-e-nazar lafz ki takraar mein gum hain

Aaqa ji ﷺ, Riaz ﷺ aap ka sharminda bohat hai Pachtaway ke din chashm-e-gunahgaar mein gum hain