Yeh Woh Mehfil Hai

یہ وہ محفل ہے جس میں اَحمد مختار آتے ہیں مَلائک لے کے رحمت کے یہاں اَنوار آتے ہیں

زیارت کے لیے بن کر مَلک زوَّار آتے ہیں نبی کو دیکھنے یاں طالبِ دِیدار آتے ہیں

غلامانِ شہِ دِیں بزم میں یوں آتے ہیں جیسے بھکاری بھیک لینے بر سرِ دَربار آتے ہیں

وہ لیجاتے ہیں بخشش کی سند سرکارِ طیبہ سے معاصی کے جو مومن لے کے یاں طومار آتے ہیں

چلو ہے میزبانی جوش پر سرکارِ طیبہ کی لیے رحمت کے خوانوں میں مَلک اَنوار آتے ہیں

نگاہِ کور باطن قاصر و مجبور ہے لیکن شہِ کون و مکاں ہر دِل میں سو سو بار آتے ہیں

منافق جانتے ہیں شرک گر اس بزمِ اَقدس کو تو خود کیوں شرک کرنے کے لیے مکار آتے ہیں

مخالف بے اَدب اس ذِکر کی رِفعت کو کیا سمجھے یہاں پر سر کے بل اہل سنن دِیں دار آتے ہیں

قیامِ محفلِ مولد سے جلتے ہیں بہت منکر مگر مومن پہن کر یاں اَدب کے ہار آتے ہیں

یہ اُن کے سبز گنبد پر بخطِ نور لکھا ہے وہ اچھے ہو کے جاتے ہیں جو یاں بیمارآتے ہیں

اُٹھے گا شور محشر میں گنہگارو نہ گھبراؤ وہ دیکھو شاہ کھولے گیسوئے خمدار آتے ہیں

خریدیں گے جو رحمت کے عوض اَنبار عصیاں کے خریدارِ ُگنہ اَب بر سرِ بازار آتے ہیں

جو کہتے ہیں مصیبت میں اَغِثْنِیْ یَارَسُوْلَ اللہ مَدد کرنے کو ان کی سید اَبرار آتے ہیں

شبِ تاریک مرقد سے نہ گھبرائے دِلِ مُضْطَر کوئی دَم میں نظر وہ چاند سے رُخسار آتے ہیں

خداوندا دَمِ آخر یہ عزرائیل فرمائیں جمیلِؔ قادری ہوشیار ہو سرکار آتے ہیں