Mere Maula Mere Sarwar

میرے مولا میرے سروَر رحمۃٌ لِّلْعالمیں میرے آقا میرے رہبر رحمۃٌ لِّلْعالمیں

لاتے ہی تشریف فرمایا کہ ھَبْ لِیْ اُمَّتِیْ اے شفیع روزِ محشر رحمۃٌ لِّلْعالمیں

دستِ اَقدس سینہ پر ہو رُوح کھنچتی ہو مری لب پہ جاری ہو برابر رحمۃٌ لِّلْعالمیں

روزِ محشر شانِ رحمت کے کرشمے دیکھنا ہے عجب پر نور منظر رحمۃٌ لِّلْعالمیں

میں پیامِ زندگی سمجھوں اگر یوں موت آئے آپ کا دَر ہو مرا سر رحمۃٌ لِّلْعالمیں

قدرتیں رب نے تمہارے تم کو دی ہیں بیشمار میرا چمکا دو مقدر رحمۃٌ لِّلْعالمیں

مَدح خوانی کا صلہ دیدار ِحق خلد بریں ہو عطا یا شاہِ کوثر رحمۃٌ لِّلْعالمیں

عالم علم لدنی آپ کو حق نے کیا حال سب روشن ہے تم پر رحمۃٌ لِّلْعالمیں

کفر کی ظلمت چھنٹی جب نور چمکا آپکا حق کے خورشیدِ منور رحمۃٌ لِّلْعالمیں

اپنے دامن میں چھپا لینا خدا کے واسطے تیز ہو جب مہرِ محشر رحمۃٌ لِّلْعالمیں

دل میں آنکھوں میں جگہ ہے آپ ہی کے واسطے آ سلیماں مور کے گھر رحمۃٌ لِّلْعالمیں

میں بھکاری در بدر کب تک پھروں خستہ خراب اب بلا لو اپنے دَر پر رحمۃٌ لِّلْعالمیں

ہم کمینے روز و شب سوتے ہیں بالکل بے خبر رات بھر روتے تھے سروَر رحمۃٌ لِّلْعالمیں

مَظہَر ذاتِ خدا محبوبِ رَبِّ دوسرا بادشاہِ ہفت کشور رحمۃٌ لِّلْعالَمیں

جس نے دیکھی تیری صورت حق اُسے یاد آگیا کیوں نہ ہوں آنکھیں منور رحمۃٌ لِّلْعالَمیں

تو نے فرمایا ھُوَ الْمُعْطِیْ وَ اِنِّیْ قَاسِم کیوں نہ مانگوں تیرے در پر رحمۃٌ لِّلْعالَمیں

روزِ محشر عاصیوں کو بخشوانے کے لیے ڈھونڈتے ہیں مثل مادَر رحمۃٌ لِّلْعالَمیں

ہم کو خواہش ہے نہ دنیا کی نہ کچھ عقبیٰ کی فکر بس گئے ہیں دِل کے اندر رحمۃٌ لِّلْعالَمیں

ہے نہ کوئی تیرا ثانی اور نہ ہوگا تا اَبد ہر صفت میں سب سے بڑھ کر رحمۃٌ لِّلْعالَمیں

دُور نے نزدیک نے آواز یکساں ہی سنی جب ہوئے بالائے منبر رحمۃٌ لِّلْعالَمیں

ہم سیہ کاروں کی بخشش کی کوئی صورت نہیں ناز ہے تیرے کرم پر رحمۃٌ لِّلْعالَمیں

میری طاعت اور محبت میں رہو بستہ کمر بس یہ ہے اِرشادِ سروَر رحمۃٌ لِّلْعالَمیں

دِین کو چھوڑو نہ دنیا کے لیے اے مومنو دِین و دُنیا دیں گے یکسر رحمۃٌ لِّلْعالَمیں

جالیاں ہوں ہاتھ میں اور اِلتجائیں لب پہ ہوں ہو مقدر یاوَری پر رحمۃٌ لِّلْعالَمیں

تیرے تیری آل کے صدقے میں اے جانِ جہاں ہو مُیَسَّر حج اَکبر رحمۃٌ لِّلْعالَمیں

تیرا جلوہ تھا شبِ اَسریٰ کہ عرش و فرش میں نورِ حق تھا جلوہ گستر رحمۃٌ لِّلْعالَمیں

کیا زمین و آسماں کیا اَنبیا کیا اَولیا سب ہیں مشتق تو ہے مصدر رحمۃٌ لِّلْعالَمیں

بس خدا اُن کو نہ کہنا اور جو چاہو کہو سب سے بالا سب سے برتر رحمۃٌ لِّلْعالَمیں

ذِکر تیرا دِلکشا اور نام تیرا جانفزا فکر تیری رُوح پروَر رحمۃٌ لِّلْعالَمیں

سب فصیحانِ زمانہ دَم بخود حیرت میں ہیں کون ہے تم سا سخن وَر رحمۃٌ لِّلْعالَمیں

رَمزِ محبوب و محب میں تیسرے کو دَخل کیا سرِ حق ہے ذاتِ اَطہر رحمۃٌ لِّلْعالَمیں

پنجتن ہیں فاطمہ خیر النسا شیرِ خدا سبطِ اَکبر سبطِ اَصغر رحمۃٌ لِّلْعالَمیں

سایۂ عرشِ الٰہی میں کھڑا کرنا مجھے ہیں سیہ عصیاں سے دفتر رحمۃٌ لِّلْعالَمیں

بے پڑھے عالم نے ہر عالم پہ علم اِلقا کیے علم غیب حق کے مظہر رحمۃٌ لِّلْعالَمیں

پنجۂ قدرت سنوارے جن کو وہ ہیں مشک ساں تیرے گیسوئے مُعَنبَر رحمۃٌ لِّلْعالَمیں

تم سخی داتا ہو میں اَدنیٰ بھکاری آپ کا دے دو ٹکڑا ہاتھ اُٹھا کر رحمۃٌ لِّلْعالَمیں

نیک بندوں پر تو رہتی ہے عنایت روز و شب رُوسیہ پر بھی کرم کر رحمۃٌ لِّلْعالَمیں

سنتے ہی جَاؤُکَ اِستغفار میں کرنے لگا ہوں جرائم عفو یکسر رحمۃٌ لِّلْعالَمیں

خادِمِ دَرباں بنالو بندۂ دَرگاہ کو پھر رہا ہوں خوار دَر دَر رحمۃٌ لِّلْعالَمیں

تشنگیِ شربتِ دِیدار سے مُضْطَر ہوں میں ہو عطا لِلّٰہ ساغر رحمۃٌ لِّلْعالَمیں

خوفِ محشر کیوں جمیلؔ قادِری رَضوی کو ہو دونوں عالم میں ہیں سر پر رحمۃٌ لِّلْعالَمیں