Hain Mazhar Zaat e Haq

ہیں مظہرِ ذاتِ حق رسولِ اَکرم مختار و خلیفۂ خدائے عالم

صرف اُنکے سبب سے سب اُلوالعزم ہوئے عیسیٰ موسیٰ خلیل و نوح و آدَم

عالم کا اُنہیں خدا نے سلطان کیا جبریلِ اَمیں کو ان کا دربان کیا

ہر چیز کا اختیار ان کو دے کر کونین کو حق نے ان کا مہمان کیا

یارب مرے دل میں عشق اپنا دے دے حُبِّ نبی کا سر میں سودا دے دے

ہے بے سرو سامان جمیلِؔ رَضوی رہنے کا مَدینے میں ٹھکانا دے دے

سرکار کا فیض زیر و بالا دیکھا ہر چیز میں نورِ شاہِ والا دیکھا

ہے عرش سے فرش تک اسی کا جلوہ جب غور کیا مَدینے والا دیکھا

شاہا تری رحمت کا اِشارہ ہوجائے روشن مرے بخت کا ستارہ ہوجائے

اس صانعِ مطلق کو جو آئی ہے پسند وہ شکل مری آنکھ کا تارا ہوجائے

بتلائے کوئی نبی کا دیکھا سایہ سایے کا بھی ہوتا ہے کسی جا سایہ

جب سایۂ نورِ اَزَلی وہ ٹھہرا پڑتا کیوں کر زمین پر اُس کا سایہ

کیوں حشر سے ڈر جائیں گدایانِ نبی کیوں قبر میں گھبرائیں گدایانِ نبی

دنیا میں جو ہیں حبیبِ حق کے بندے تا حشر ہے ان کے سر پہ دامانِ نبی

ہیں کعبۂ کونین رَسول الثقلین ہیں قبلۂ دارَین نبی الحرمَین

کیوں دونوں جہاں نہ اُن کے دَر پر مانگیں ہیں قاسم کل شئی جدّالحسنین

Free Up Space - Get Lyrics Without Bulky Screenshots!

کیوں حشر میں بگڑی ہوئی حالت ہوگی کب اُن کے غلاموں پہ قیامت ہوگی

کیا خو ف کریں نارِ جہنم سے جمیلؔ ہم پر تو وہاں نبی کی رحمت ہوگی