Yeh Hai Eman Ke Hain Baad-e-Khuda Khair-ul-Bashar Afzal

یہ ہے ایماں کہ ہیں بعد خدا خیر البشر افضل خدا جانے مقامِ مصطفیٰﷺ ہے کس قدر افضل

لگے سرکار کے قدموں سے جو ذرّے جواہر ہیں انہیں کے فیض نسبت سے ہوئے سنگ و شجر افضل

فضیلت ہے معانی آشنا اُن کی اداؤں سے ہر اک پہلو ہے ان کی زندگی کا سر بسر افضل

ہدایت بخش سب انداز ہیں شاہِ مدینہ کے ہے ان کا ہر عمل افضل، سفر افضل، حضر افضل

نقوشِ پا انہیں کے خضر کو رستہ دکھاتے ہیں انہیں کا راستہ سیدھا، انہیں کی رہگزر افضل

خدا کا ذکر ہو جس میں، نبیﷺ کی نعت ہو جس میں نہ کیوں وہ شام ہو پیاری، نہ کیوں ہو وہ سحر افضل

Download Lyrics & Access Offline - Install Our App Now!

پرکھ لو بات یہ بے شک شریعت کی کسوٹی پر ہے بیت اللہ سے میرے نبیؐ کا مستقر افضل

مرا آغاز اور انجام ہے شہزاد نعت اُن کی ہوا ہے کام اک مجھ سے یہی مقدور بھر افضل