Ya Ilahi Har Jagah Teri Ata Ka Saath Ho

Ya Ilahi har jagah teri ata ka saath ho Jab pare mushkil Shah-e-Mushkil Kusha ka saath ho

Ya Ilahi bhool jaaun naz'a ki takleef ko Shadi-e-deedar-e-husn-e-Mustafa ka saath ho

Ya Ilahi gor-e-teera ki jab aaye sakht raat Un ke pyare munh ki subh-e-jaanfiza ka saath ho

Ya Ilahi jab pare mahshar mein shor-e-dar-o-geer Aman dene wale pyare peshwa ka saath ho

Ya Ilahi jab zabaanein bahar aayen pyaas se Sahib-e-Kausar Shah-e-jood-o-ata ka saath ho

Ya Ilahi sard mehri par ho jab khursheed-e-hashr Sayyid-e-besaya ke zill-e-liwa ka saath ho

Ya Ilahi garmi-e-mahshar se jab bharken badan Daman-e-mehboob ki thandi hawa ka saath ho

Ya Ilahi nama-e-aamal jab khulne lagen Aib-posh-e-khalq Sattar-e-khata ka saath ho

Ya Ilahi jab bahein aankhein hisab-e-jurm mein Un tabassum-rez honton ki dua ka saath ho

Ya Ilahi jab hisab-e-khanda-e-beja rulaye Chashm-e-giryan-e-Shafi-e-Murtaza ka saath ho

Ya Ilahi rang layein jab meri bebakiyan Un ki neechi neechi nazron ki haya ka saath ho

Ya Ilahi jab chaloon tareek rah-e-pul-e-sirat Aftab-e-Hashmi Noor-ul-Huda ka saath ho

Why Screenshot When You Can Download? Get the App for Efficient Storage!

Ya Ilahi jab sar-e-shamshir par chalna pare Rabb-e-sallim kehne wale ghamzada ka saath ho

Ya Ilahi jo dua-e-nek main tujh se karoon Qudsiyon ke lab se aameen Rabbana ka saath ho

Ya Ilahi jab Raza khwab-e-giran se sar uthaye Daulat-e-bedar ishq-e-Mustafa ka saath ho