Ya Ilahi Har Jagah Teri Ata Ka Saath Ho

یا الہٰی ہر جگہ تیری عطا کا ساتھ ہو جب پڑے مشکل شہ مشکل کشا کا ساتھ ہو

یا الہٰی بھول جاؤں نزع کی تکلیف کو شادیِ دیدار حسنِ مصطفیٰ کا ساتھ ہو

یا الہٰی گورِ تیرہ کی جب آۓ سخت رات ان کے پیارے منہ کی صبحِ جانفزاکا ساتھ ہو

یا الہٰی جب پڑے محشرمیں شورِ دار و گیر امن دینے والے پیارے پیشوا کا ساتھ ہو

یا الہٰی جب زبانیں باہر آئیں پیاس سے صاحبِ کوثر شہِ جود و عطا کا ساتھ ہو

یا الہٰی سرد مہری پرہو جب خورشید حشر سیّد بےسایہ کے ظلِ لِوا کا ساتھ ہو

یا الہٰی گرمی محشر سے جب بھڑکیں بدن دامنِ محبوب کی ٹھنڈی ہوا کا ساتھ ہو

یا الہٰی نامہ اعمال جب کھلنے لگیں عیب پوشِ خلق ستّارِ خطا کا ساتھ ہو

یا الہٰی جب بہیں آنکھیں حسابِ جرم میں ان تبسم ریز ہونٹوں کی دعا کا ساتھ ہو

یا الہٰی جب حساب خندۃ بیجا رلاۓ چشمِ گریانِ شفیع مرتضیٰ کا ساتھ ہو

یا الہٰی رنگ لائیں جب مری بےباکیاں ان کی نیچی نیچی نظروں کی حیا کا ساتھ ہو

یا الہٰی جب چلوں تاریک راہ پل صراط آفتابِ ہاشمی نور الہدیٰ کا ساتھ ہو

Why Screenshot When You Can Download? Get the App for Efficient Storage!

یا الہٰی جب سر شمشیر پر چلنا پڑے ربِّ سلم کہنےوالے غمزدہ کاساتھ ہو

یا الہٰی جو دعائے نیک میں تجھ سے کروں قدسیوں کے لب سے آمیں ربنا کا ساتھ ہو

یا الہٰی جب رضا خواب گراں سے سراٹھاۓ دولت بیدار عشقِ مصطفیٰ کا ساتھ ہو