Zameen o Zamaan Tumhare Liye

زمیں و زماں تمھارے لئے مکین و مکاں تمہارے لئے چنیں و چناں تمھارے لئے بنے دو جہاں تمہارے لئے

دہن میں زباں تمہارے لئے بدن میں ہے جاں تمہارے لئے ہم آئے یہاں تمہارے لئے اٹھیں بھی وہاں تمہارے لئے

اصالت کل ، امامت کل، سیادت کل ، امارت کل حکومت کل ، ولایت کل، خدا کے یہاں تمہارے لئے

تمہاری چمک تمہاری دمک تمہاری جھلک تمہاری مہک زمیں و فلک سماک وسمک میں سکہ رواں تمہارے لئے

وہ کنز نہاں یہ نور فشاں وہ کن سے عیاں یہ بزم فکاں یہ ہر تن و جاں یہ باغ و جناں یہ سارا سماں تمہارے لئے

یہ شمس و قمر یہ شام و سحر یہ برگ و شجر یہ باغ و ثمر یہ تبغ و سپر یہ تاج و کمر یہ حکمِ رواں تمہارے لئے

نہ روحِ امیں نہ عرشِ بریں نہ لوحِ مبیں کوئی بھی کہیں خبر ہی نہیں جو رمزیں کھلیں ازل کی نہاں تمہارے لئے

جناں میں چمن، چمن میں سمن، سمن میں پھبن، پھبن میں دلہن سزائے محن پہ ایسے منن یہ امن و اماں تمہارے لئے

اشارے سے چاند چیر دیا، چھپے ہوئے خور کو پھیر دیا گئے ہوئے دن کو عصر کیا یہ تاب و تواں تمہارے لئے

صبا وہ چلے کہ باغ پھلے، وہ پھول کھلے کہ دن ہو بھلے لوا کے تلے ثناء میں کھلے رضؔا کی زباں تمہارے لئے