Mustafa Jaan e Rahmat Pe Lakhun Salam

مصطفیٰ جانِ رحمت پہ لاکھوں سلام شمعِ بزم ہدایت پہ لاکھوں سلام

شہر یارِ اِرم تاجدار حرم نوبہار شفاعت پہ لاکھوںسلام

شبِ اسریٰ کے دولہا پہ دائم درود نوشہ بزم جنت پہ لاکھوںسلام

ہم غریبوں کے آقا پہ بے حد درود ہم فقیروں کی ثروت پہ لاکھوںسلام

طائران قدس جس کی ہیں قمریاں اس سہی سر و قامت پہ لاکھوںسلام

جس کے ماتھے شفاعت کا سہرا رہا اس جبین سعادت پہ لاکھوںسلام

نیچی آنکھوں کی شرم و حیا پر درود اونچی بینی کی رفعت پہ لاکھوں سلام

پتلی پتلی گل قدس کی پتیاں ان لبوں کی نزاکت پہ لاکھوں سلام

وہ دہن جس کی ہر بات وحیِ خدا چشمۂ علم و حکمت پہ لاکھوں سلام

جس سے کھاری کنویں شیرۂ جاں بنے اس زلال حلاوت پہ لاکھوں سلام

وہ زباں جس کو سب کن کی کنجی کہیں اس کی نافذ حکومت پہ لاکھوں سلام

اس کی باتوں کی لذت پہ لاکھوں درود اس کے خطبے کی ہیبت پہ لاکھوں سلام

جس کی تسکیں سے روتے ہوئے ہنس پڑے اس تبسم کی عادت پہ لاکھوں سلام

ہاتھ جس سمت اٹھا غنی کر دیا موج بحر سماحت پہ لاکھوں سلام

جس کو بارِ دوعالم کی پروا نہیں ایسے بازو کی قوت پہ لاکھوں سلام

نور کے چشمے لہرائیں دریا بہیں انگلیوں کی کرامت پہ لاکھوں سلام

کل جہاں ملک اور جو کی روٹی غذا اس شکم کی قناعت پہ لاکھوں سلام

کھائی قرآں نے خاکِ گزر کی قسم اس کفِ پا کی رحمت پہ لاکھوں سلام

جس سہانی گھڑی چمکا طیبہ کا چاند اس دل افروز ساعت پہ لاکھوں سلام

سیدہ زاہرہ طیبہ طاہرہ جانِ احمد کی راحت پہ لاکھوں سلام

حسن مجتبیٰ سیدالاسخیا راکب دوش عزت پہ لاکھوں سلام

بنت صدیق آرامِ جانِ نبی اس حریم برات پہ لاکھوں سلام

ایک میرا ہی رحمت پہ دعویٰ نہیں شاہ کی ساری امت پہ لاکھوں سلام

کاش محشر میں جب ان کی آمد ہو بھیجیں سب ان کی شوکت پہ لاکھوں سلام

مجھ سے خدمت کے قدسی کہیں ہاں رضاؔ مصطفیٰ جانِ رحمت پہ لاکھوں سلام