Woh Din Bhi The

Woh din bhi thay keh sarabon ka naam saahil tha Nah kainat ki aankhein nah waqt ka dil tha

Badi ka ghulghala tha zulm par jawani thi Darindagi-o-jahalat ki hukmarani thi

Gumaan-o-wahm ka naam aitbaar rakha tha Khuda ko murtiyon mein utaar rakha tha

Koi nazara-e-dilkash nah tha nazar ke liye Taras raha tha jahan Afzal-ul-Bashar ﷺ ke liye

Warood-e-khawar-e-nau Aamina ke ghar mein hua Nabi ﷺ ka husn bhi shamil har ek sahar mein hua

Farishtay aap ﷺ ko jhoola jhulane aatay thay Durood parhte hazaron zamanay aatay thay

Palat ke chand usi samt se fida hota Jidhar ishara-e-angusht-e-Mustafa ﷺ hota

Woh bakriyan bhi baray hi naseeb wali thin Jo faizyab-e-hisar-e-Huzoor ﷺ-e-aali thin

Baray huay toh kiya karobar kapray ka Banaye aqd bana karobar-e-kapray ka

Meray Huzoor ﷺ pe jab wahi-e-awwalin utri Dil-e-Khadija pe bhi roshni-e-deen utri

Kiya Ali ne bhi iqrar yaar-e-ghaar ke baad Qadam qadam pe bahaar aayi phir bahaar ke baad

Khuda ka noor jo Faran se tulu hua Toh ek silsila Islam ka shuru hua

Ahad ahad ki sada aayi jab zabanon par Toh bijliyan si girin kufr ke thikanon par

Kaman-e-zulm se Abu Jahl-o-Abu Lahab niklay Duayen haath mein le kar Shah-e-Arab niklay

Sitam magar Abu Sufyan ne bhi kam nah kiye Bilal-o-Zaid ne sar apne phir bhi kham nah kiye

Nabi ne zulm sahay saathiyon ne zulm sahay Magar ba-hukm-e-Khuda sabr ki hadon mein rahay

Har ek musibat-o-takleef be-daregh uthayi Kisi se zulm ka badla liya nah tegh uthayi

Jinhein shaoor ne imaan ki hararat di Unhein Huzoor ﷺ ne firdous ki basharat di

Kaha yeh aap ne, ek roz woh bhi aayega Tumhare paon talay honge Qaisar-o-Kisra

Qabail aatay rahay aur deen phalta raha Charagh-e-Mustafawi ﷺ aandhiyon mein jalta raha

Zaban pe, apne dilon ki mohabbatein le kar Wufood aayay Madinay ki dawatain le kar

Banaam-e-Shu'ab-e-Abi Talib bhi ek ghaati thi Khuda ke bandon ki jis ne hayat chati thi

Jab un ki baat Rasool-e-Khuda ﷺ nahin manay Toh mil ke ahd kiya mushrikeen-e-Makkah ne

Nabi ﷺ se aur Nabi ﷺ ke har ek sahabi se Kisi bhi qism ka koi nah wasta rakhay

Sahabiyon ke shikam sookh sookh jatay thay Toh apni mashkon ke chamray bhigo ke khatay thay

Ajeeb zulm-o-sitam ke mohasray mein rahay Keh do baras woh mo'ashi muqati'ay mein rahay

Musibaton ka unhon ne pahar kaat liya Toh us mua'iday ko deemkon ne chaat liya

Ba-izn-e-Sarwar-e-Konain, Ja'far-e-Tayyar Gaye jo Habsha toh pohancha diye gaye darbar

Najashi bola batao tumhara deen hai kiya? Kalam kiya hai, Nabi ﷺ par tumhare jo utra

Sunayi Hazrat Ja'far ne Surah-e-Maryam Toh sun ke aankh Najashi ki ho gayi pur-nam

Kaha aman-o-sukoon hai yahan, yahin pe raho Wafa ke ghar mein mohabbat ki sarzameen pe raho

Najashi jaisa bhi kam hoga khush-naseeb koi Namaz us ke janazay ki Mustafa ﷺ ne parhayi

Maqam-e-Hijr pe ek roz jama thay kuffar Usi taraf nikal aayay toh ghir gaye Sarkar

Pakad liya unhein chadar samet dushman ne Uchhal di meray Aaqa ﷺ pe ret dushman ne

Lagaye zakhm jo jism-e-Nabi ﷺ-e-rehmat par Toh cheekh cheekh uthay Abu Bakr us aziyat par

Nabi ﷺ ke qatl ke mansubay seena seena huay Toh hukm-e-Haq se Nabi ﷺ azim-e-Madinah huay

Nikal ke Makkah se jab Shah-e-Kainat chalay Aqab mein aap ke dushman bhi saath saath chalay

Parao aap ne jab Ghaar-e-Thaur mein dala Toh munh pe ghaar ke makri ne bun diya jala

Zara jo khauf Abu Bakr ko hua zimnan Baray sukoon se kaha Mustafa ﷺ ne, La Tahzan

Madinah pohanchay toh sab khair maqdam aayay Har ek zaban pe tha, chand se Nabi ﷺ aayay

Muhajiron se woh Ansar ne sulook kiya Misaal la nah saki jis ki aaj tak duniya

Dharakne lag gaye do dil har ek seenay mein Dikhayi denay laga Makkah bhi Madinay mein

Zameen bant li aapas mein, ghar bhi bant liye Mohabbaton ki tarah maal-o-zar bhi bant liye

Sabhi raza-e-Khuda-o-Nabi ﷺ ke thay bhedi Kisi ke paas thin do biwiyan toh ek de di

Tamam chehray banaam-e-Rasool ﷺ khulne lagay Siyahiyon mein ujalon ke phool khulne lagay

Kuch aisay seedha kiya har tabiyat-e-kaj ko Mila diya meray Aaqa ﷺ ne Aus-o-Khazraj ko

Huo yeh faisla-e-khushnuma bhi ghair ke saath Rahenge mil ke musalman Banu Nazeer ke saath

Rag-e-tahaffuz-e-Taiba mein khoon bharnay ka Mua'ida hua mil kar difa karne ka

No More Screenshots! Save Storage with Our Lyrics App!

Buraiyon ka tasawwur khurooj ko pohancha Naseeb-e-khalq-o-sharafat urooj ko pohancha

Hua dayar-e-Nabi ﷺ fath toh yeh bolay Nabi ﷺ Nah hogi aaj kisi se bhi baz-purs koi

Nah ho woh khauf zada jis ne hum pe ki bidad Khuda gawah keh har shakhs aaj hai azad

Ma'af karta hoon Hinda ko, woh bhi ab nah daray Magar yeh keh do meray samnay nah aaya karay

Jo ghar mein ho Abu Sufyan ke usay bhi amaan Jo aayay sayay mein imaan ke usay bhi amaan