Mein Ne Jab Aap Ki Dehleez

Main ne jab Aap ki dehleez ko Aqa ﷺ chooma Yun laga Aap ne jaise mera maatha chooma

Hont farigh hue pal bhar ko na aankhein meri Kabhi jaali kabhi roza kabhi parda chooma

Aap ko khwab mein dekha to muqaddar jaage Jhoom utha, naat padhi ro diya, lipta, chooma

Un ke qadmon ki taraf le gaye jab hont mujhe Hont bhi naqsh-e-qadam ban gaye itna chooma

Safar-e-Arsh pe le jaane ko Jibreel jab aaye Apne rukhsar se mehtaab-e-kaf-e-paa chooma

Hajar-e-Aswad ko diya bosa to mehsoos hua Hajar-e-Aswad ko nahin haath Khuda ka chooma

Main batata hoon tumhein ishq-nawardi kya hai Ek aahat ke liye saara Madina chooma

Shahd sa daud gaya hai meri sharyanon mein Jab kabhi padh ke durood apna angootha chooma

Your Lyrics, Even Offline - Install the App for Free!

Manzelein rehti hain seene mein Muzaffar mere Woh jidhar bhi gaye main ne woh rasta chooma