Tujhe Mill Gayi Khudai

Tujhe mil gayi khudai Halimah Ke hai god mein Mustafai Halimah

Yeh kya kam hai teri barai Halimah Zamane ke lab par hai "Mai Halimah"

Bahut loriyan deen Maah-e-Aminah ؒ ko Kahan tak hai teri rasai Halimah

Muyassar nahin hai kisi ko jahan mein Woh daulat jo tu ne kamai Halimah

Liya god mein jab Shafi'ul Wara ﷺ ko Bare fakhr se muskurai Halimah

Rasool ﷺ-e-Khuda aur aaghosh us ki Woh khidmat ke lamhe, woh dai Halimah

Jo taqdeer tujh ko ata ki Khuda ne Kisi aur ne kab woh pai Halimah

Use apni aaghosh mein tu liye hai Ke shahi hai, jis ki gadai Halimah

No Internet? No Problem! Get the App for Offline Lyrics!

Woh azmat mili hai ke Allahu Akbar Muqaddar ki tere duhai Halimah

Usi ki ziyaon se jagmag hai aalam Mubarak Mah-e-Mustafai Halimah

Naseer ؔ apni qismat pe nazan ho jis dam Mile tere dar ki gadai Halimah