Tujhe Mill Gayi Khudai

تجھے مل گئی خدائی حلیمہ کہ ہے گود میں مصطفائی حلیمہ

یہ کیا کم ہے تیری بڑائی حلیمہ زمانے کے لب پر ہے" مائی حلیمہ"

بہت لوریاں دیں مہ آمنہٖؒ کو کہاں تک ہے تیری رسائی حلیمہ

میسر نہیں ہے کسی کو جہاں میں وہ دولت جو تُو نے کمائی حلیمہ

لیا گود میں جب شفیعؐ الوریٰ کو بڑے فخر سے مسکرائی حلیمہ

رسولِؐ خدا اور آغوش اُس کی وہ خدمت کے لمحے' وہ دائی حلیمہ

More Lyrics, Less Storage - Install the App and Ditch the Screenshots!

جو تقدیر تجھ کو عطا کی خدا نے کسی اور نے کب وہ پائی حلیمہ

اُسے اپنی آغوش میں تُو لۓ ہے کہ شاہی ہے' جس کی گدائی حلیمہ

وہ عظمت مِلی ہے کے اللہ اکبر مقدر کی تیرے دہائی حلیمہ

اسی کی ضیاؤں سے جگمگ ہے عالم مبارک مہِ مصطفائی حلیمہ

نصیرؔ اپنی قسمت پہ نازاں ہو جس دم ملے تیرے در کی گدائی حلیمہ