Kon Ho Masnad Nasheen Khak e Madina Chorr Kar

Kaun ho masnad-nasheen khaak-e-Madinah chhor kar Khuld dekhe kaun, koo-e-Shah-e-Bat-ha chhor kar

Dil ki basti aur armanon ki dunya chhor kar Haaye kyun laute thay hum shehr-e-Madinah chhor kar

Ghar se pohanche un ke rauzay par to hum ko yun laga Jaisay aa niklay koi gulshan mein, sehra chhor kar

Kaun nazron par charhay husn-e-haqeeqat ke siwa Kis ka munh dekhein hum un ka ruy-e-zeeba chhor kar

Allah Allah aamad-e-Sultan-e-ins-o-jaan ki shaan Ek taraf qudsi bhi ho jatay thay, rasta chhor kar

Mustafa jannat mein jayenge na ummat ke baghair Ja nahin sakta kabhi tinkon ko darya chhor kar

Thi na chahat dil mein Zahra ke dularon ki agar Kyun utartay thay Nabi, mimbar se khutba chhor kar

Rehruwan-e-rah-e-haq thay aur bhi lakhon, magar Koi manzil par na pohancha ibn-e-Zahra chhor kar

Un sahaba ke us andaaz-e-qana'at par salaam Un ki chaukhat par jo aa baithay thay, kya kya chhor kar

Woh azal se meray Aqa, main ghulam ibn-e-ghulam Kyun kisi ke dar pe jaaun un ka sadqa chhor kar

Khwan-e-shahi ki hawas rakhtay nahin un ke gada Kyun udhar lapkein, woh un tukron ka chaska chhor kar

Woh salamat aur un ka dar salamat ta-abad Kyun phirein dar-dar, hum is kooche ka phera chhor kar

Main kahan ghoomon, kahan thehroon, kisay dekha karoon Un ki galiyan, un ki jaali, un ka rauza chhor kar

Ittifaqan gar chalay jatay woh sahil par kabhi Machliyan aatein qadam lenay ko, darya chhor kar

Zehan mein rakhiye woh irshad-e-Nabi waqt-e-wisaal Ja raha hoon sunnat-o-Quran ko yakja chhor kar

Ae musalman! Hai yahi hukm-e-Khuda-o-Mustafa Fikr-e-uqba kar hamesha, fikr-e-dunya chhor kar

Instant Access to Thousands of Lyrics - Tap to Install!

Poochhne phir kaun aayega Naseer un ke siwa Jis lahad mein tujh ko sab lautenge tanha chhor kar