Meri Zindagi Ka Tujh Se

Meri zindagi ka tujh se yeh nizam chal raha hai Tera aastan salamat mera kaam chal raha hai

Nahi arsh-o-farsh par hi teri azmaton ke charche Teh-e-khak bhi lahad mein tera naam chal raha hai

Woh teri ata ke tevar, woh hujoom-e-gird-e-Kausar Kahin shor-e-may-kashan hai kahin jaam chal raha hai

Kisi waqt Ya Muhammad ki sada ko main na bhoola Dam-e-naz'a bhi zaban par yeh kalam chal raha hai

Mere haath aa gayi hai yeh kaleed-e-qufl-e-maqsad Tera naam le raha hoon mera kaam chal raha hai

Koi yaad aa raha hai mere dil ko aaj shayad Jo yeh sail-e-ashk-e-hasrat sar-e-shaam chal raha hai

Woh barabari ka tu ne diya dars-e-aadmi ko Ke ghulam naaqah par hai toh imam chal raha hai

Yeh asar hai teri sunnat ke mazaaq-e-saadgi ka Reh-e-khaas chalne wala reh-e-aam chal raha hai

Tere lutf-e-khusravi par mera kat raha hai jeevan Mere din guzar rahe hain mera kaam chal raha hai

Mujhe is qadar jahan mein na qabool-e-aam milta Tere naam ke sahare mera naam chal raha hai

Teri mohr kya lagi ke koi hunar na hote Meri shayari ka sikka sar-e-aam chal raha hai

Instant Access to Thousands of Lyrics - Tap to Install!

Yeh teri dua ke hai kuch abhi hum mein waza-daari Yeh teri nazar ke aapas mein salam chal raha hai

Main tere nisaar Aaqa! yeh haqeer par nawazish Mujhe jaanti hai dunya mera naam chal raha hai

Tera ummati bas itni hi tameez kaash kar le Woh halal kha raha hai ke haram chal raha hai

Kari dhoop ke safar mein nahi kuch Naseer ko gham Tere saya-e-karam mein yeh ghulam chal raha hai