Tujh Ko Ankhon Mein Liye

Tujh ko aankhon mein liye jab main yeh duniya dekhun Har sahar mein tere maathe ka ujaala dekhun

Aaina ban ke jo saari bashariyat aaye Koi tasveer koi aks na tujh sa dekhun

Meri beenaiyon ke par se nikal aate hain Jab khalaon mein tera naqsh-e-kaf-e-pa dekhun

Download Lyrics & Access Offline - Install Our App Now!

Tere qadmon se lipatne mein hai meraj meri Teri dehleez pe Jibreel ko baitha dekhun

Kya samaye mere lafzon mein badai teri Saf mein nabiyon ke tera chahne wala dekhun

Shauq hota hai jo betab tilawat ke liye Rehal-e-dil par tere jalwon ka saheefa dekhun

Teri angusht-e-tasawwur se bhi chashme phooten Tere sehra mein kisi ko bhi na pyasa dekhun

Aankh walon ko nazar aayi na parchhayin teri Main to deewar-e-abad tak tera saya dekhun

Daal den mujh pe Muzaffar jo woh kaali kamli Rooh ke ghaar se khursheed nikalta dekhun