Teri Baat Baat Hai Mojza

Teri baat baat hai maujza tera lamha lamha misaal hai Main faqeer-e-marg-o-hayat hoon teri ik nazar ka sawaal hai

Teri zindagi bhi ajeeb hai tu ameer hai ke ghareeb hai Tera paaye-naaz hai arsh par tere bazuo'n mein kaddaal hai

Tera sikka ban ke chala karoon teri khair par main pala karoon Tera ishq hai mera maal-o-zar, mera rizq tera khayal hai

Tera ilm ilm ki intiha, teri aql aql se maawara Tu hai sadr-e-mehfil-e-ambiya tera deen deen-e-kamaal hai

No Internet? No Problem! Get the App for Offline Lyrics!

Tu bulandiyon se buland tar tu bashar hai hum sa nahin magar Teri rehguzar bhi hai aasman tera naqsh-e-pa bhi hilaal hai

Tujhe dekh dekh ke main jiyoon tujhe thaam thaam ke main chaloon Tu hai aaina main hoon hairatein, main nigaah hoon tu jamaal hai

Mujhe roz-e-hashr ka gham nahin teri ik nigaah bhi kam nahin Tu hi sarparast-e-shuroo hai tu hi aitbaar-e-ma'aal hai