Soya Hua Naseeb Jaga Dijiye

Soya hua naseeb jaga dijiye Huzoor Meetha Madinah mujh ko dikha dijiye Huzoor

Ab chal Madinah ka mujhe muzdah sunaiye Rotay huay ko ab to hansa dijiye Huzoor

Phir sabz gumbad aur woh minaar ki bahaar Ghaus-o-Raza ka sadqa dikha dijiye Huzoor

Never Be Without Your Favorite Lyrics - Get the App for Offline Access!

Miskeen hoon, ghareeb hoon pallay nahi hai kuch Kharcha safar ka dijiye na dijiye Huzoor

Arafat aur Muzdalifah aur Mina chaloon Hajj kar loon Haq se izn dila dijiye Huzoor

Khulafa-e-Rashideen ke sadqay mein Ya Nabi Khwabon mein apna jalwa dikha dijiye Huzoor

Saail gham-e-Madinah ka hoon Shah-e-Bahrobar Mujh ko gham-e-Madinah shaha dijiye Huzoor

Ahmed Raza ka wasta ulfat ka saqiya Mujh ko chalakta jaam pila dijiye Huzoor

Har waqt soz-e-ishq mein tarpa karoon shaha Aag aisi meray dil mein laga dijiye Huzoor

Zahra ke laadlon ka waseela main laya hoon Pazmurdah dil ko meray khila dijiye Huzoor

Sadqa Shaheed-e-Karbala ka Shah-e-Ambiya Deewana-e-Madinah bana dijiye Huzoor

Ya Mustafa! Main ulfat-e-dunya mein phans gaya Is qaid se khudara chura dijiye Huzoor

Pur-khar wadiyon mein bhatak ke main reh gaya Bhooley huay ko raah dikha dijiye Huzoor

Tauba nibah mein nahi pata hoon Ya Nabi Ab istiqamat aap shaha dijiye Huzoor

Dar lag raha hai aah! Jahannam ki aag se Bakhshish ka mujh ko muzdah suna dijiye Huzoor

Qufl-e-Madinah dijiye Murshid ka wasta Khamosh rehna mujh ko sikha dijiye Huzoor

Attar-e-bad-khisaal ka isyaan shiaar ka Dil murdah ho chuka hai jila dijiye Huzoor