Aye Biyaban e Arab

Ae biyaban-e-Arab teri baharon ko salam Tere phoolon ko tere pakeeza kharon ko salam

Jabal-e-Noor-o-Jabal-e-Thaur aur un ke gharon ko salam Noor barsate paharon ki qitaron ko salam

Jhoomte hain muskurate hain mughilan-e-Arab Khoobsurat wadiyon ko regzaron ko salam

Raat din rehmat barasti hai jahan par jhoom kar Un tawaf-e-Kaaba ke rangeen nazaron ko salam

Ishq mein deewar-e-Kaaba se jo lipte hain wahan Un sabhi deewanon sare be-qararon ko salam

Hajar-e-Aswad, Baab-o-Meezab-o-Maqam-o-Multazam Aur ghilaf-e-Kaaba ke rangeen nazaron ko salam

Mustajar-o-Mustajab-o-Bir-e-Zamzam aur Mataf Aur Hateem-e-Paak ke donon kinaron ko salam

Rukn-e-Shami-o-Iraqi-o-Yamani ko bhi aur Jagmagate noor barsate manaron ko salam

Jo musalman khana-e-Kaaba ka karte hain tawaf Un ko bhi aur sare hi sajda-guzaron ko salam

Khoob choome hain qadam Thaur-o-Hira ne Shah ke Mehke mehke pyare pyare donon gharon ko salam

Madani munnon ka bhi hamla khoob tha bu-Jahal par Badr ke un donon nanhe jaan-nisaron ko salam

Find Your Favorite Lyrics Anytime, Anywhere - Install the App Today!

Jagmagate Gumbad-e-Khizra pe ho rehmat mudam Masjid-e-Nabvi ke noorani manaron ko salam

Mimbar-o-Mehrab-e-Janan aur sunehri jaliyan Sabz gumbad ke makeen ko donon pyaron ko salam

Sayyidi Hamza ko, aur jumla shaheedan-e-Uhud Ko bhi aur sab ghaziyon ko shahsawaron ko salam

Jis qadar jinn-o-bashar mein the Sahaba Shah ke Sab ko bhi beshak khusoosan chaar yaron ko salam

Jis jagah par aake soye hain Sahaba das hazar Us Baqi-e-Paak ke sare mazaron ko salam

Shauq-e-deedar-e-Madinah mein tarapte hain jo, un Be-qararon, dil-figaron, ashkbaron ko salam

Ghusl-e-Kaaba ka bhi manzar kis qadar pur-kaif hai Jhoom kar kehta hai Attar in nazaron ko salam