Shukar Tera Ho Sake

شکر تیرا ہوسکے کس طرح رحمٰن رسول مجھ سے عاصی کو کیا تو نے ثناخوانِ رسول

یاالٰہی عشقِ مولیٰ میں مجھے ایسا گما تا اَبد نکلے نہ میرے دل سے اَرمانِ رسول

اَمر اُن کا اَمرِ رب ہے نہی اُن کی نہیِ رب وہ ہے فرمانِ الٰہی جو ہے فرمانِ رسول

دو جہاں میں آفتابِ ہاشمی کی ہے ضیا آئینہ ہیں ہر دوعالم پیش چشمانِ رسول

ہیں مَلک روضے پہ حاضر دابِ شاہی کے لیے ورنہ خود مولیٰ تعالیٰ ہے نگہبانِ رسول

بھول جائے باغ و گل کو چھوڑ دے سیر چمن عندلیب زار گر دیکھے بیابانِ رسول

اُن کے دَر سے بھیک پاتے ہیں سلاطینِ جہاں بادشاہانِ زمانہ ہیں گدایانِ رسول

ایک ہم ہیں جو فراق و ہجر میں تڑپا کریں اِک وہ ہیں جو بنے قسمت سے دَربانِ رسول

چل دیئے جو روضۂـ شہ کی زیارت کے لیے ہوگئے گھر سے نکلتے ہی وہ مہمانِ رسول

ہے بیابانِ مَدینہ جان اَہل خلد کی آبروئے جنت الماویٰ گلستانِ رسول

سَوْف یُعْطِیْکَ فَتَرْضٰی مہر ہے اس بات پر خلد میں بے شبہہ جائیں گے گدایانِ رسول

اس طرح آئیں گے اُن کے نام لیوا حشر میں لب پہ ہوگا نامِ حق ہاتھوں میں دامانِ رسول

یاالٰہی آفتابِ حشر جب تیزی دکھائے سایہ گستر ہو گنہگاروں پہ دامانِ رسول

کربلا والوں کا صدقہ شاہِ جیلاں کا طفیل عاصیوں کے جرم دھو دے چشمِ گریانِ رسول

اُن کے قدموں پر کیے قربان اپنے جان و مال آفریں صد آفریں اے جاں نثارانِ رسول

منکرانِ مجلس میلاد سے کہہ دے کوئی محفلِ اَقدس میں آکر دیکھ لیں شانِ رسول

جس طرح وَاصف ہے دنیا میں جمیلؔ قادری حشر میں بھی ہو یوہیں یارب ثنا خوانِ رسول