Karlo Maqbool Ya Rasool Allah

کر لو مقبول یا رَسُوْلَ اللہ یہ مری اِلتجا رَسُوْلُ اللہ

بانیِ مجلس مبارک کو دیجے بہتر صلہ رَسُوْلُ اللہ

جتنے سنی شریک مجلس ہیں سب پہ کر دو عطا رَسُوْلُ اللہ

آپ کے آستاں کے بندے ہیں بخش دو ہر خطا رَسُوْلُ اللہ

ہر مصیبت میں کیجیے اِمداد جب پکاریں کہ یَارَسُوْلُ اللہ

اس کی فوراً مراد بر آئی جس نے دل سے کہا رَسُوْلُ اللہ

قبر میں حشر و نشر و میزاں پر ہر اَلم سے بچا رَسُوْلُ اللہ

خلد میں اپنے ساتھ لے لینا اپنے بندوں کو یَارَسُوْلُ اللہ

تیرے بندے لگائے بیٹھے ہیں تیرا ہی آسرا رَسُوْلُ اللہ

پیر و مرشد مرے جنابِ رضا ان پہ سایہ ترا رَسُوْلُ اللہ

ان کی اولاد سب پھلے پھولے حشر تک دائما رَسُوْلُ اللہ

حامد و مصطفیٰ رضا کے پھول مہکیں تا حشر یَا رَسُوْلُ اللہ

ان کی اَولاد کا قیامت تک رہے گلشن ہرا رَسُوْلُ اللہ

ان کے اَعدا پہ رکھ انہیں غالب اور عزت بڑھا رَسُوْلُ اللہ

ان کے اَعدا پہ قہر کی بارش تا اَبد دائما رَسُوْلُ اللہ

شاد و آباد ان کے دوست رہیں پھلیں پھولیں سدا رَسُوْلُ اللہ

نیچری گاندھوی وہابی سے سنیوں کو بچا رَسُوْلُ اللہ

سب مریضانِ اہلسنّت کو دے دو کامل شفا رَسُوْلُ اللہ

اہلسنّت کے ناتوانوں کو کر دو طاقت عطا رَسُوْلُ اللہ

ہر جگہ میرے والدین پہ ہو رحم و فضل آپ کا رَسُوْلُ اللہ

میرے اہل و عیال پر رحمت آپ کی دائما رَسُوْلُ اللہ

کریں احمد حمید اور حماد حمد تری سدا رَسُوْلُ اللہ

عمر و علم و عمل دوامی عیش ان کو کیجے عطا رَسُوْلُ اللہ

رَنج و غم کی نہ دیکھیں شکل کبھی تیری رحمت سے یَارَسُوْلُ اللہ

میرے اَحباب پر بھی فضل رہے ہر گھڑی آپ کا رَسُوْلُ اللہ

غوثِ اعظم کا واسطہ ہو قبول میری ہر اِلتجا رَسُوْلُ اللہ

اپنے بندے جمیلؔ رضوی کو خاص بندہ بنا رَسُوْلُ اللہ