Hai Konain Ke Sar Pe

ہے کونین کے سر پہ رحمت نبی کی کرے پھر نہ کیوں ناز اُمت نبی کی

نہ کیونکر رہے ہر جگہ سنیوں پر خدا کا کرم اور عنایت نبی کی

ہمیں جائیں گے خلد میں سب سے پہلے نبی کے ہیں ہم اور جنت نبی کی

بنائے گئے ہم شفاعت کی خاطر ہمارے لیے ہے شفاعت نبی کی

وہی لطف پائیں گے روزِ قیامت جو رکھتے ہیں دنیا میں اُلفت نبی کی

قیامت کا دن صرف اِس واسطے ہے کہ دِکھلائیں اُس روز عزت نبی کی

یہ رِضواں کو حکمِ خدا ہے کہ پہلے چلی جائے جنت میں اُمت نبی کی

فقط ایک عالم نہیں اُن پہ شیدا خدا کو بھی پیاری ہے صورت نبی کی

وہ فرماتے ہیں مَنْ رَّاٰنِیْ رَاَ الْحَقَّ کچھ ایسی بنائی ہے صورت نبی کی

چلے جائیں گے خلد میں زہد والے گنہگار دیکھیں گے صورت نبی کی

زمانہ ہے شاہِ عرب کا بھکاری دو عالم میں بٹتی ہے دولت نبی کی

نہ کیوں سبز گنبد پہ عالم ہو قرباں کہ اس میں بنی پیاری تربت نبی کی

عجب جالیاں ہیں سنہری سنہری عجب پیاری پیاری ہے تربت نبی کی

نہ لگتا تھا سدرہ پہ جبریل کا دِل گوارا نہ تھی ان کو فرقت نبی کی

فرشتوں میں اَفضل کیا یوں خدا نے کہ کرتے تھے جبریل خدمت نبی کی

بلایا خدا نے اُنہیں لامکاں میں ہوئی عرشِ اَعظم پہ دعوت نبی کی

نہ ہوگا کوئی بعد اُن کے پیمبر بتاتی ہے مہرِ نبوت نبی کی

صحابہ ہیں سب مثلِ اَنجم دَرخشاں سفینہ ہے اُمت کا عترت نبی کی

ابوبکر کی شان و عزت تو دیکھو رہی بعد رحلت بھی قربت نبی کی

دوشنبہ کو اَفضل کیا یوں خدا نے کہ اس میں ہوئی ہے وِلادت نبی کی

بحکمِ اَحادِیث اِیمان یہ ہے کہ ہو سب سے بڑھ کر محبت نبی کی

ہے تصدیقِ وَحدانیت جزوِ اِیماں مگر اَصلِ اِیماں ہے اُلفت نبی کی

کتابِ الٰہی یہ فرما رہی ہے ہے طاعت خدا کی اِطاعت نبی کی

نبی کے محب ہو تو محبوبِ رَب ہو خدا کو ہے اِتنی محبت نبی کی

کسی کی کسی کو نہیں ہے نہ ہوگی خدا کو ہے جتنی محبت نبی کی

وہ آئی وہ آئی وہ آئی وہ آئی شفاعت شفاعت شفاعت نبی کی

نہ گھبراؤ بندو نہ گھبراؤ بندو یہ کہتی ہے ہم سے وَجاہت نبی کی

رَاٰنِیْ رَاَ الْحَقّ یہ فرما رہا ہے ہے رُویت خدا کی زِیارت نبی کی

دَمَک کر چمک کر یہ کہتی ہے صورت کہ جلوہ خدا کا ہے طلعت نبی کی

مِلا جس کو جو کچھ یہیں سے مِلا ہے ہے مشہورِ عالم سخاوَت نبی کی

نہیں ہوتی کم خرچ کرنے سے کچھ بھی عجب بڑھتی دولت ہے نعمت نبی کی

خدا نے دیا ہے مگر ان کے ہاتھوں عطا تو خدا کی ہے قسمت نبی کی

عذابِ خدا منکروں پر اُترتا نہ ہوتی اگر عام رحمت نبی کی

عوض ظلم کے دشمنوں کو دُعا دی جہاں سے نرالی ہے عادت نبی کی

اِشارے سے اِک چاند کے دو بنائے ہے تا عرش نافذ حکومت نبی کی

مہ و مہر اَرض و سما عرش و کرسی نہیں جانتا کون قدرت نبی کی

گرے آکے اَشجار قدموں پہ ان کے جمادات نے دی شہادت نبی کی

دَمِ نزع مرقد میں روزِ قیامت خدایا مُیَسَّر ہو قربت نبی کی

نہ چھوڑا کسی کو بھی دستِ عطا نے ملا سب کو سب کچھ بدولت نبی کی

عدو کے جلانے کو اے سنیو تم کرو جس سے ظاہر ہو شوکت نبی کی

جمیلؔ اپنے اِیماں کا اِیمان یہ ہے کہ ہو دِل میں خالص محبت نبی کی