Khuda Ke Pyare Nabi

خدا کے پیارے نبی ہمارے رؤف بھی ہیں رحیم بھی ہیں شفیع بھی ہیں رسول بھی ہیں مُطاع بھی ہیں قسیم بھی ہیں

اٹھاتے تکلیفیں کافروں سے دُعا ہدایت کی ان کی کرتے تمام اَوصاف میں ہیں یکتا شکور بھی ہیں حلیم بھی ہیں

یہ لادوا ہے مرض ہمارا طبیب کیوں کر کریں گے چارہ علاج میرا کریں گے آقا طبیب دل ہیں حکیم بھی ہیں

نہیں ہے کچھ عرض کی ضرورت کہ ان پہ روشن ہے سب کی حالت رسولِ اَکرم سمیع بھی ہیں بصیر بھی ہیں علیم بھی ہیں

اُنہیں کے در کے ہیں ہم بھکاری اُنہیں کی یہ نعمتیں ہیں ساری اُنہیں کے ہیں سَلسَبِیل و کوثر اُنہیں کے قَصرِ نعیم بھی ہیں

وہ عرش کے تاجدار مولیٰ صفت ہے یٰسٓ ثنا ہے طہٰ غنی و معطی ہے نام اُن کا عرب کے دُرِّیتیم بھی ہیں

ہر ایک گل میں ہے رنگ اُن کا زبانِ بلبل پہ اُن کا نغمہ ہے سب کی آنکھوں میں نور اُن کا وہ سب کے دل میں مقیم بھی ہیں

عطا کیے ہیں لقب خدا نے ہمارے آقا کو کیسے پیارے اَمین بھی ہیں مَکین بھی ہیں عزیز بھی ہیں عظیم بھی ہیں

میں ان کا بندہ وہ میرے مولیٰ وہ میرے مالک میں ان کا بردہ خد اکے فضل و کرم سے آقا حفیظ بھی ہیں کریم بھی ہیں

انہیں کے سر پر ہے تاجِ عزت انہیں کے باعث ہے ساری خلقت نہ کیوں ہوں مالک وہ عرشِ حق کے حبیب بھی ہیں کلیم بھی ہیں

عفو ہو تم عزیز ہو تم وکیل ہو تم کفیل ہو تم تمہارے بندے ہیں ہم اگرچہ سقیم بھی ہیں اَثیم بھی ہیں

جمیلؔ رضوی قادری کو غمِ عذابِ اَلیم کیوں ہو مَدینے والے ہیں اس کے سر پر مدد پہ غوثِ عظیم بھی ہیں