Aao Mehfil Mein Ghulaman e Rasool

آؤ محفل میں غلامانِ رسولِ عربی آج ہے جوش پہ فیضانِ رسولِ عربی

جھومتے پھرتے ہیں مستانِ رسولِ عربی ہے مہک پر چمنستانِ رسولِ عربی

کیسے عشاق تھے یارانِ رسولِ عربی اپنے سر کردیے قربانِ رسولِ عربی

ایسی وُسعت سے بچھا خوانِ رسولِ عربی سارا عالم ہوا مہمانِ رسولِ عربی

کعبہ و اَرض و سما شمس و قمر حور و مَلک ہیں سبھی تابعِ فرمانِ رسولِ عربی

حور و غلماں کی تمنا ہو نہ شوقِ جنت جس نے دیکھا ہے بیابانِ رسولِ عربی

اپنی قسمت پہ نہ کیوں فخر کروں لاکھوں بار دیکھوں جب گنبدِ ایوانِ رسولِ عربی

اُس نے اللہ کے جلوؤں کا کیا نظارہ جس نے دیکھا رُخِ تابانِ رسولِ عربی

اُن کی مدحت نہیں کچھ اِنس ومَلک پر موقوف ذَرَّہ ذَرَّہ ہے ثنا خوانِ رسولِ عربی

کس کو سرکار سے نعمت نہ ملی کون ہے وہ جو نہیں بندۂ احسانِ رسولِ عربی

رَمزِ محبوب و محب کون سمجھ سکتا ہے حکمِ رحمٰن ہے فرمانِ رسولِ عربی

قبر و محشر کا انہیں غم ہی نہیں کچھ اَصلاً جن کے ہاتھوں میں ہے دامانِ رسولِ عربی

ان کا بندہ ہوا اللہ کا محبوب بنا صاف فرماتا ہے قرآنِ رسولِ عربی

تیرہ بختوں کے مقدر کو ذرا چمکا دے اے ضیائے دُرِ دَندانِ رسولِ عربی

دِین و دُنیا کی مُیَسَّر ہوئی اُن کو شاہی جو ہوئے دِل سے گدایانِ رسولِ عربی

چھوڑ کر سلطنتیں ا ن کے بنے خاک نشیں آفریں باد فقیرانِ رسولِ عربی

رُوبرو مثلِ کفِ دَست ہیں دونوں عالم کیسی پرنور ہیں چشمانِ رسولِ عربی

بادۂ حب نبی خوب جمائی رنگت ہوگئے مست غلامانِ رسولِ عربی

چشمِ دِل گورِ غریباں کو منوّر کردے میں فدا شمعِ شبستانِ رسولِ عربی

قبر میں جب کہ نکیرین کریں مجھ سے سوال میں کہوں بندۂ دَربانِ رسولِ عربی

داخلِ خلد کیے جائیں گے اَہلِ عصیاں جوش پر آئے گی جب شانِ رسولِ عربی

فاتحِ بابِ شفاعت کے سبب حکم ملا جائیں جنت میں گدایانِ رسولِ عربی

یاالٰہی یہ دعا ہے کہ بروزِ محشر سر پہ ہو سایۂ دامانِ رسولِ عربی

اے جمیلِؔ رضوی تیری حقیقت کیا ہے جب خدا خود ہے ثنا خوانِ رسولِ عربی

یہ رضا کا ہے تصدق کہ جمیلِؔ رضوی ہوا مشہور ثناخوانِ رسولِ عربی ہاں سنا کوئی غزل اَور جمیلؔ رضوی کہ ہیں مشتاق محبانِ رسولِ عربی