Shukar Tera Ho Sake

Shukr tera ho sake kis tarah Rahman-e-Rasool Mujh se aasi ko kiya tu ne sana-khwan-e-Rasool

Ya Ilahi ishq-e-Maula mein mujhe aisa guma Ta-abad nikle na mere dil se arman-e-Rasool

Amr un ka amr-e-Rab hai nahi un ki nahi-e-Rab Woh hai farman-e-Ilahi jo hai farman-e-Rasool

Your Lyrics, Even Offline - Install the App for Free!

Do jahan mein aftab-e-Hashmi ki hai ziya Aaina hain har do aalam pesh-e-chashman-e-Rasool

Hain malak rozay pe hazir daab-e-shahi ke liye Warna khud Maula Ta'ala hai nigahban-e-Rasool

Bhool jaye bagh-o-gul ko chhod de sair-e-chaman Andaleeb-e-zaar gar dekhe bayaban-e-Rasool

Un ke dar se bheek paate hain salatin-e-jahan Badshahan-e-zamana hain gadayan-e-Rasool

Ek hum hain jo firaq-o-hijr mein tadpa karein Ik woh hain jo bane qismat se darban-e-Rasool

Chal diye jo Rauza-e-Shah ki ziyarat ke liye Ho gaye ghar se nikalte hi woh mehman-e-Rasool

Hai bayaban-e-Madinah jaan-e-ahl-e-khuld ki Aabru-e-Jannat-ul-Ma'wa gulistan-e-Rasool

SAWFA YU'TIKA FATARDA mohar hai is baat par Khuld mein be-shubha jayenge gadayan-e-Rasool

Is tarah aayenge un ke naam-lewa hashr mein Lab pe hoga naam-e-Haq hathon mein daman-e-Rasool

Ya Ilahi aftab-e-hashr jab tezi dikhaye Saya-gastar ho gunahgaron pe daman-e-Rasool

Karbala walon ka sadqa Shah-e-Jilan ka tufail Aasiyon ke jurm dho de chashm-e-giryan-e-Rasool

Un ke qadmon par kiye qurban apne jaan-o-maal Aafreen sad aafreen ae jaan-nisaran-e-Rasool

Munkiran-e-majlis-e-milad se keh de koi Mehfil-e-aqdas mein aa kar dekh lein shan-e-Rasool

Jis tarah Wasif hai duniya mein Jamil Qadri Hashr mein bhi ho yunhi ya Rab sana-khwan-e-Rasool