Tere Jalwe Ke Samne

Aainah munfa'il tere jalwe ke saamne Sajid hain mehr-o-mah tere talwe ke saamne

Jaari hai hukum yeh ke do paarah qamar hua Angusht-e-Mustafa ke ishaare ke saamne

Kyun dar badar faqeer tumhara kare sawaal Jab tum ho bheek maangne waale ke saamne

Yeh woh kareem hain ke jo maango wahi mile Usay saailo chalo toh dua le ke saamne

Mangta ki arz Shah-e-Madinah qabool ho Turbat bani ho aap ke rozay ke saamne

Rabb-e-Kareem hai yeh dua meri roz-e-hashr Sharmindah main na hoon tere pyaare ke saamne

Wazn-e-amal ka khauf ho kyun mujh aseem ko Sarkar honge khud mere pallay ke saamne

Jannat toh kheenchti hai ke meri taraf chalo Imaan le chala hai Madine ke saamne

Shah-o-gada faqeer salateen-e-rozgaar Maujood hai har ik tere rozay ke saamne

Aankhein hon band lab pe dua dil mein ho durood Phaile hon haath aap ke gumbad ke saamne

No More Screenshots! Save Storage with Our Lyrics App!

Is tarah maut aaye toh ho zindagi meri Ka'abay mein main hoon munh ho Madine ke saamne

Kya lutf ho jo khaak-e-Madinah pe main maroon Maujood tum bhi ho mere murday ke saamne

Tauqeer un ke ghar ki hai manzoor is qadar Ka'aba ka munh kiya hai Madine ke saamne

Ahl-e-nazar ne ghaur se dekha toh yeh khula Ka'aba jhuka hua tha Madine ke saamne

Woh din Jameel-e-Qadri Razvi ko ho naseeb Parhta ho naat aap ke rozay ke saamne