Sharf De Hajj Ka Mujhe

شَرَف دے حج کامجھے میرے کبریا یارب روانہ سُوئے مدینہ ہو قافِلہ یارب

دکھا دے ایک جھلک سبز سبز گنبد کی بس اُن کے جلووں میں آجائے پھر قضا یارب

مدینے جائیں پھر آئیں دوبارہ پھر جائیں اِسی میں عمر گزر جائے یاخدا یارب

مِرا ہو گنبدِ خَضرا کی ٹھنڈی چھاؤں میں رسولِ پاک کے قدموں میں خاتِمہ یارب

بَوقتِ نَزع سلامت رہے مِرا ایماں مجھے نصیب ہو توبہ ہے التجا یارب

جو ’’دیں کا کام‘‘ کریں دل لگا کے یااللہ اُنہیں ہو خواب میں دیدارِ مصطَفٰے یارب

تِری مَحَبَّت اُتر جائے میری نَس نَس میں پئے رضا ہو عطا عِشقِ مصطفٰے یارب

زمانے بھر میں مچا دیں گے دھوم سنّت کی اگر کرم نے ترے ساتھ دیدیا یارب

نَماز و روزہ وحَجّ و زکوٰۃ کی توفیق عطا ہو اُمّتِ محبوب کوسدا یارب

جواب قبر میں منکَر نکیر کو دوں گا ترے کرم سے اگر حوصَلہ ملا یارب

بروزِ حشر چھلکتا سا جام کوثر کا بدستِ ساقیِٔ کوثر ہمیں پلا یارب

بقیعِ پاک میں عطارؔ دَفن ہو جائے برائے غوث و رضا از پئے ضِیا یارب