Tajdar e Haram Aye Shehan-Shah e Deen

تاجدارِ حرم اے شہنشاہِ دیں تم پہ ہر دم کروڑوں درود و سلام ہو نگاہِ کرم ہم پہ سلطانِ دیں تم پہ ہر دم کروڑوں درود و سلام

دور رہ کر نہ دم ٹوٹ جائے کہیں کاش! طیبہ میں اے میرے ماہ مبیں دفن ہونے کو مل جائے دو گز زمیں تم پہ ہر دم کروڑوں درود و سلام

کوئی حسنِ عمل پاس میرے نہیں پھنس نہ جاؤ قیامت میں مولا کہیں اے شفیع امم لاج رکھنا میری تم پہ ہر دم کروڑوں درود و سلام

دونوں عالم میں کوئی بھی تم سا نہیں سب حسینوں سے بڑھ کر تمہیں ہو حسیں قاسم رزق رب العلیٰ ہو تمہیں تم پہ ہر دم کروڑوں درود و سلام

فکر امت میں راتوں کو روتے رہے عاصیوں کے گناہوں کو دھوتے رہے تم پہ قربان جاؤں میرے مہ جبیں تم پہ ہر دم کروڑوں درود و سلام

پھول رحمت کے ہر دم لٹاتے رہے ہم غریبوں کی بگڑی بناتے رہے حوضِ کوثر پہ نہ بھول جانا کہیں تم پہ ہر دم کروڑوں درود و سلام

کافروں کے ستم ہنس کے سہتے رہے پھر بھی ہر آن حق بات کہتے رہے کتنی محنت سے کی تم نے تبلیغِ دیں تم پہ ہر دم کروڑوں درود و سلام

موت کے وقت کر دو نگاہِ کرم کاش اس شان سے یہ نکل جائے دم سنگ در پہ تمہارے ہو میری جبیں تم پہ ہر دم کروڑوں درود و سلام

اب مدینے میں سب کو بلا لیجئے اور سینہ مدینہ بنا دیجئے از پئے غوث اعظم امام مبیں تم پہ ہر دم کروڑوں درود و سلام

عشق سے تیرے معمور سینہ رہے لب پہ ہر دم مدینہ مدینہ رہے بس میں دیوانہ بن جاؤں سلطان دیں تم پہ ہر دم کروڑوں درود و سلام

دور ہو جائیں دنیا کے رنج و الم ہو عطا اپنا غم دیجئے چشم نم مال و دولت کی کوئی تمنا نہیں تم پہ ہر دم کروڑوں درود و سلام

پھر بلا لو مدینے میں عطاؔر کو اپنے قدموں میں رکھ لو گنہگار کو کوئی اس کے سوا آرزو ہی نہیں تم پہ ہر دم کروڑوں درود و سلام