Shah e Madina Alvida

Hasrata wa hasrata Shah-e-Madinah alwida Phat raha hai aap ke gham mein yeh seena alwida

Khoob aata tha suroor Aaqa Madine mein mujhe Chhoot-ta hai haye ab meetha Madinah alwida

Teri galiyon se bichhar kar bhi hai koi zindagi Door reh kar haye marna haye jeena alwida

Aankh roti hai tarapta hai dil-e-ghamgeen ab Lut raha hai haye qurbat ka khazeena alwida

Dil mira gham-naak furqat se kaleja chaak chaak Phat raha hai tere gham mein haye! seena alwida

Main shikasta dil liye bojhal qadam rakhta hua Chal para hoon ya Shahanshah-e-Madinah alwida

Khoon rota hai dil-e-maghmoom hijr-e-Shah mein Chaak hai mera kaleja chaak seena alwida

Qafila chalne ko hai sab ro rahe hain zaar zaar Toot-ta hai haye! dil ka aabgeena alwida

Jaane kab phir aayega meetha Madinah dekhne Kab safar paayega badkaar o kameena alwida

No More Screenshots! Save Storage with Our Lyrics App!

Naam sunte hi Madine ka main Aaqa ro paroon Kaash! aajaye mujhe aisa qareena alwida

Aap ki yaadon ke sadqe woh mile sanjeedgi Main na phir beja hanson Shah-e-Madinah alwida

Maal ka talib nahi de do faqat soz-e-Bilal Ho ata apne gada ko yeh khazeena alwida

Apni ulfat ki sharab aisi pila aaye na hosh Mujh ko hargiz ae Shahanshah-e-Madinah alwida

Kaash! main jaaun jidhar dekhun Madine ki bahaar Ho ata Aaqa mujhe woh chashm-e-beena alwida

Go bura hoon, be-amal hoon par nahi hoon be-adab Aap ka hoon, aap ka, go hoon kameena, alwida

Al-firaqu aah al-firaq ae pyare Aaqa al-firaq Phir bulalo jald Aaqa-e-Madinah alwida

Ya RasoolAllah! ab le lo salam-e-aakhiri Chalne wala hai Karachi ko safeena alwida

Aah! ab Attar jaata hai Madine se watan Haye majboori! sukoon-e-qalb cheena alwida