Shah e Konain

Shah-e-Konain, Khair-ul-Amam Mere aaqa mere mohtaram Aap ki rehmaton ki qasam Aap ka hai karam hi karam

Aap dibacha-e-dojahan Dastaan, surkhi-e-dastaan Aap hi ronaq-afroz hain Abd-o-mabood ke darmiyan

Aap ki tarbiyat ne kiya Haq ke aage jabeenon ko kham Aap ka hai karam hi karam

Kitna pyara hai naam aap ka Kitna ooncha maqam aap ka Aadamiyat, mureed aap ki Aur tamaddun ghulam aap ka

Lamhay lamhay ke hathon mein hain Aap ki azmaton ke alam Aap ka hai karam hi karam

Aap tashreef jab laaye thay Adl, chahat, adab laaye thay Aap ki chaap thi arsh par Khak par noor-e-Rabb laaye thay

Jahl ko rehnuma kar diya But kaday ko banaya haram Aap ka hai karam hi karam

Jab se yeh aap ki ho gayi Zindagi, zindagi ho gayi Dil se aane lagein khushbu-ein Zehan mein roshni ho gayi

Free Up Space - Get Lyrics Without Bulky Screenshots!

Meri aankhon mein aarasta Aap hi ke nishan-e-qadam Aap ka hai karam hi karam

Zikr jab aaye hai aap ka Dard tarpaye hai aap ka Daagh hi daagh us dil pe hain Woh jo kehlaye hai aap ka

Apne shayar Muzaffar ka bhi Aap rakhte hain kitna bharam Aap ka hai karam hi karam