Shad Hai Firdous

Shaad hai Firdous ya'ni ek din Qismat-e-khuddam ho hi jaayega

Lutf un ka aam ho hi jaayega Shaad har nakaam ho hi jaayega

Jaan de do wa'da-e-deedar par Naqd apna daam ho hi jaayega

Yaad reh jaayengi yeh bebakiyan Nafs tu to raam ho hi jaayega

Your Lyrics, Even Offline - Install the App for Free!

Be-nishanon ka nishan mitta nahin mitte mitte naam ho hi jaayega

Yaad-e-gesu zikr-e-Haq hai aah kar Dil mein paida laam ho hi jaayega

Ek din aawaz badlenge yeh saaz Chahchaha kohram ho hi jaayega

Sailo! daaman sakhi ka thaam lo Kuch na kuch inaam ho hi jaayega

Yaad-e-abru kar ke tadpo bulbul-o! Tukre tukre daam ho hi jaayega

Mufliso! un ki gali mein ja paro Baagh-e-khuld ikraam ho hi jaayega

Gar yunhi rehmat ki taweelen rahin Madh har ilzaam ho hi jaayega

Baada-khwari ka samaan bandhne to do Sheikh durd-aasham ho hi jaayega

Gham to un ko bhool kar lipta hai yun Jaise apna kaam ho hi jaayega

Mit! ke gar yunhi raha qarz-e-hayat Jaan ka neelaam ho hi jaayega

Aaqilo! un ki nazar seedhi rahe Bauron ka bhi kaam ho hi jaayega

Ab to laayi hai shafa'at afw par Barhte barhte aam ho hi jaayega

Ae Raza! har kaam ka ik waqt hai Dil ko bhi aaram ho hi jaayega