Sadaf e Noor Ilahi

Sadaf-e-noor-e-Ilahi ka guhar kya hoga Sirf khaliq jo nahi tha woh bashar kya hoga

Us ki kirno se har ik aankh lipatti hogi Matla-e-jism ka andaaz-e-sahar kya hoga

Manzilein baantne aaya tha jo gumrahon ko Us jahan saaz ki hijrat ka safar kya hoga

Liye phirta hoon Muhammad ﷺ sa haseen aankhon mein Zara socho toh mira husn-e-nazar kya hoga

Jism-e-athar ko chhooye khaak-e-zameen, na mumkin Arsh-e-saani ke siwa zer-e-kamar kya hoga

Aane walon pe jo qismat ki tarah khulta ho Haram-e-paak-e-Muhammad ﷺ ka woh dar kya hoga

More Lyrics, Less Storage - Install the App and Ditch the Screenshots!

Kaun kar sakta hai dushman ko maaf us ki tarah Aur koi us ki tarah seena sipar kya hoga

Naat se log parakhte hain Muzaffar mujh ko Is se barh kar mira mayaar-e-hunar kya hoga