Roshan Charagh Khatm e Nabuwat

Roshan charagh-e-khatm-e-nubuwwat hai aaj bhi Har mojza ba-shakl-e-karamat hai aaj bhi

Is noor ki azal se woh rif'at hai jaan lo Qausain ek pal ki musafat hai aaj bhi

Samjha gaya Huzoor ko jitna bhi aaj tak Utna hi jaanne ki zaroorat hai aaj bhi

Download Lyrics & Access Offline - Install Our App Now!

Mohtaj-e-kainaat hai un ke wujood ki Woh hain toh kainaat salamat hai aaj bhi

Kehte toh hain Rasool-e-Nabi ''hain'' aur jaante hain ''the'' Kis darja be-shuoori-e-ummat hai aaj bhi

Kuch bhi na tha woh jab bhi tajalli the noor ki Jo kuch bhi hai unhi ki badaulat hai aaj bhi

Un ke baghair kya hai tasawwur hayat ka Ek ek saans un ki amanat hai aaj bhi

Kis shaan se hai noor-e-Nabi kainaat mein Jitni baseerat utni hi ru'yat hai aaj bhi

Zinda rakha hua hai faqat un ki deed ne Warna yeh zindagi toh qayamat hai aaj bhi