Mera Jahan Bhi Tu

Mira jahan bhi tu, tu hi aaqibat meri Tere baghair nahi kuch bhi haisiyat meri

Mira jhuka hua sar bhi buland hai kitna Tera nishan-e-kaf-e-pa hai saltanat meri

Bas ek boond teri, mere ilm ka dariya Bas ek ism-e-girami tera lughat meri

Why Screenshot When You Can Download? Get the App for Efficient Storage!

Tere khayal mein rehta hai gum wajood mira Maqam ki nahi mohtaj shahriyat meri

Jo waqt sarf hua apne liye wohi ghaata Jo saans kharch ho tujh par wohi bachat meri

Jo tujh ko dekh kar aaye main woh nazar dekhun Jidhar se teri sada aaye woh jahat meri

Main kya karun teri nisbat pe naaz hai mujh ko Mere niaz ka hissa hai tamkanat meri

Muzaffar un ke ghulamon ka bhi ghulam hun main Jahan mein kyun na barhe qadr-o-manzalat meri