Matla-e-Subh-e-Arab Par Hai Saja Mehr-e-Munir

مطلعِ صبحِ عرب پر ہے سجا مہرِ منیر دینے آیا ہے اندھیروں کو ضیا مہرِ منیر

ابتدائے آفرینش کا محرک اس کا نور ہے کمالاتِ بشر کی انتہا مہرِ منیر

ضوفشاں ہے کائناتِ حُسن میں اس کا جمال زینتِ کون و مکاں، نورِ خدا مہرِ منیر

Never Be Without Your Favorite Lyrics - Get the App for Offline Access!

آج تک جس سے منور ہے ضمیرِ کائنات روشنی کا وہ مکمل سلسلہ مہرِ منیر

قاسمِ فیضانِ باری، پیکرِ لطف و کرم رحمتِ حق، منبعِ صدق و صفا مہرِ منیر

بحرِ اسرار و معارف، صاحبِ خُلقِ عظیم کنزِ عرفاں، مخزنِ جود و سخا مہرِ منیر

روحِ عیسیٰؑ، جانِ موسیٰؑ، قرۃ العینِ خلیلؑ فخرِ آدمؑ، مقتدائے انبیا مہرِ منیر

تیری کرنوں سے مزین جس کا طول و عرض ہو دے مجھے خیرات میں ایسی قبا مہرِ منیر

تیری سیرت سے ملا ہے میری ہستی کو جواز کیسے ہو گا مجھ سے تیرا حق ادا مہرِ منیر

روزِ محشر دوں گا میں شہزاد یوں اُن کو صدا المدد! اے شافعِ روزِ جزا مہرِ منیر!