Martaba Mujh Ko

Martaba mujh ko fana-fil-ishq darkaar hai Apne aaine mein aks-e-Mustafa darkaar hai

Jaisa woh fayyaz waisi tahi-daamani meri Mujh bhikari ko Shah-e-Arz-o-Sama darkaar hai

Laut jaa ahd-e-Nabi ki simt raftar-e-jahaan Phir meri pasmandagi ko irtiqa darkaar hai

Main ne apni justuju mein kitni sadiyan kaat dein Mere Maula mujh ko apna hi pata darkaar hai

Qeemti poshak mein bhi hai barhana zindagi Roshni ko tere saaye ki qaba darkaar hai

Sirf tujh par kharch karna chahta hoon zindagi Ek shab mein umar bhar ka rat-jaga darkaar hai

Le bhi le ab apni rehmat ki panahon mein ise Ummat-e-bimar ko Dar-ush-Shifa darkaar hai

More Lyrics, Less Storage - Install the App and Ditch the Screenshots!

Zeena-e-khushnudi-e-Haq hain tere naqsh-e-qadam Pehle woh tera bane jis ko Khuda darkaar hai

Ek pal bhi ho bohat tujh tak pohanchne ke liye Tay na jo karna pade woh raasta darkaar hai

Batlaye habs-e-doori hai Muzaffar Warsi Shah-e-Batha is ko Batha ki hawa darkaar hai