Markaz e Adal o Muhabbat

Markaz-e-adl-o-mohabbat aap hain Har zamane ki zaroorat aap hain

Baad az hamd-o-sanaye Zul-Jalal Laiq-e-kul madh-o-midhat aap hain

Yeh jahan qudrat ka hai ik aaina Aainay ka husn-e-soorat aap hain

Waqt ke lab par qaseeda aap ka Harf-e-Kun ka maqsad-e-niyat aap hain

Aap mehrab-e-azal mein jalwa-gar Sahib-e-khatm-e-nabuwwat aap hain

Jo chali thi Hazrat Ibrahim ؑ se Deen-e-haq ki woh riwayat aap hain

Aaye duniya mein hazaron ambiya Laye jo hatmi shariyat aap hain

Sab mazahir majlisi hain aap ke Sadr-e-aiwan-e-haqeeqat aap hain

Aap hain Allah ke aini gawah Aitebar-e-adamiyat aap hain

Aap ne todi hudood-e-lamakan Ham-rikab-e-har musafat aap hain

Aap par nazil hua Quran-e-Pak Yaani us ki ayat ayat aap hain

Har Nabi ki khoobiyan hain aap mein Intihaye jam'iyat aap hain

Hama-daan hai ummiyat bhi aap ki Waris-e-aql-o-firasat aap hain

Gumrahi ke aalmi sahraon mein Chashma-e-rushd-o-hidayat aap hain

Ek pal bhi umar ka ojhal nahin Motabar tareekh-e-seerat aap hain

Pooray din ki roshni jaisa wajood Aaftab-e-wahi-o-dawat aap hain

Aap ka har harf, harf-e-ezadi Rast-guftari ki hurmat aap hain

Aap ka har ik amal husn-e-hayat Shahkar-e-kamiliyat aap hain

Aap par logon ke batin munkashif Musleh-e-takhayyul-o-khalwat aap hain

Saya-e-alam yatimi aap ki Khazin-e-har be-baza'at aap hain

Fakhr ke ma'ni faqiri aap ki Yaani dil walon ki daulat aap hain

Aap ke pairo shaoor-o-lashaoor Peshway-e-ilm-o-hikmat aap hain

Haq Ta'ala tak pahunchne ke liye Be-waseelon ki wasatat aap hain

De hareef-e-jaan shahadat aap ki Wali-e-sidq-o-sadaqat aap hain

Doston ke wastay kya hon ge aap Dushmanon ke haq mein rehmat aap hain

Zalimon ke samnay haq baat ki Saaray mazloomon ki taqat aap hain

Aap ke qadmon ki mitti ki qasam Aasman-e-istiqamat aap hain

Waqf-e-deen hai lamha lamha aap ka Phir bhi masroof-e-siyasat aap hain

Jood-o-istaghna, tawakkul, maskanat Saari qadron ki zamanat aap hain

Azm-o-istiqlal ki, eesar ki Kis qadar roshan alamat aap hain

Aap ki tanhai bhi ik taifa Kitni kasrat khez wahdat aap hain

Ae khateeb-e-mimbar-e-koh-e-Safa Jaan-e-taqreer-o-khitabat aap hain

Aarzuon ka laqab be-nafsiyan Ajz-e-insani ki rif'at aap hain

Aap ki faqa-kashi par sang dang Paikar-e-sabr-o-qana'at aap hain

Dil nahin toda kisi dukh dard ka Sarparast-e-hijr-o-hijrat aap hain

Mujrimon ko sazaye rahm de Aisa qanoon-o-adalat aap hain

Saltanat aarayi ki tasveer mein Rang-e-mazdoori-o-mehnat aap hain

Har qadam kuffar se jang azma Har nafas meh-e-ibadat aap hain

Ahl-e-khana bhi hain aur ahbab bhi Ghaar ki bhi zaib-o-zeenat aap hain

Chalte phirte aur sotay jagte Mustajab-e-Rabb-ul-Izzat aap hain

Jism-e-athar par chatai ke nishan Aur Sultan-e-riyasat aap hain

Aap ka ek ek lamha daimi Ek alam-geer quwwat aap hain

Faateh-e-dil, faateh-e-zehn-o-zameer Ishq ka dar-ul-hukumat aap hain

Jo hamaray paas rakhwayi gayi Kibriya ki woh amanat aap hain

Dhoondti rehti hain aankhein aap ko Mera mauzoo-e-ziyarat aap hain

Aap ka main mo'taqid jasoos hoon Meray jazbon ki hararat aap hain

Zehn mera aap se hat-ta nahin Meri duniya meri jannat aap hain

Never Be Without Your Favorite Lyrics - Get the App for Offline Access!

Mar mitoon main aap ke namoos par Meri izzat meri azmat aap hain

Aap hi ka aasra baad-e-fana Shafi-e-roz-e-qayamat aap hain

Kya daroon be-wazni-e-a'mal se Ya Muhammad ﷺ jab salamat aap hain