Khuda Ki Hai Enayat

خدا کی ہے عنایت ماہِ رمضان آنے والا ہے ہوئی مولیٰ کی رحمت، ماہِ رمضان آنے والا ہے

مہِ رَمضاں، مہِ غفراں، مہِ سبحاں، مہِ رَحماں کھلیں گے بابِ جنت، ماہِ رمضان آنے والا ہے

مساجد ہوں گی پھر آباد شیطاں جل مرے ناشاد ملے مومن کو فرحت ماہِ رمضان آنے والا ہے

دل مغموم پھر اِک بار خوشیوں سے ہوا سرشار ہوئی حاصل مسرت ماہِ رمضان آنے والا ہے

خوشی سے جھومتا ہے دل مچی ہے قلب میں ہلچل مِلی عاشق کو فرحت ماہِ رمضان آنے والا ہے

تراویح اور، نمازوں میں، کمی ہو گی نہ روزوں میں کرو مل کر، یہ نیت، ماہِ رمضان آنے والا ہے

الٰہی! عافیت دینا، سلامت دل عطا کرنا عطا کر دے تو صحت، ماہِ رمضان آنے والا ہے

میں رمضان المبارک پاؤں روزے سارے رکھ پاؤں تو رکھ زندہ سلامت، ماہِ رمضان آنے والا ہے

نبی کے عشق میں روؤں، مدینے کیلئے تڑپوں خدا دے سوز و رِقت، ماہِ رمضان آنے والا ہے

رہوں قائم میں توبہ پر، خدایا فضل ایسا کر گناہوں سے دے نفرت، ماہِ رمضان آنے والا ہے

خدا ایسی عنایت کر، میں کانپوں خوف سے تھر تھر ہو عصیاں سے حفاظت، ماہِ رمضان آنے والا ہے

عبادت میں ریاضت میں، درودوں میں تلاوت میں الٰہی! دے دے لذت، ماہِ رمضان آنے والا ہے

محمد مصطَفٰے صَلَّی اللہُ عَلَیْہِ وَاٰلِہٖ وَسَلَّم کا واسطہ تو بخش دے مولٰی عطا کر باغِ جنت، ماہِ رمضان آنے والا ہے

خدا عطارؔ کی بخشش، تو فرما دے بلا پرسش طفیل اعلیٰ حضرت، ماہِ رمضان آنے والا ہے