Kash Dasht e Taiba

Kash! dasht-e-Tayyabah mein, main bhatak ke mar jaata Phir Baqi-e-Gharqad mein dafn koi kar jaata

Kash! jaanib-e-Tayyabah aah! yun agar jaata Chaak chaak main le kar seena-o-jigar jaata

Kash! gumbad-e-Khazra par nigah parte hi Kha ke ghash mein gir jaata phir tarap ke mar jaata

Zahideen-e-dunya bhi rashk karte Aasi par Mustafa ﷺ ke qadmon mein dafn ho agar jaata

Ya Nabiyy-e-Rahmat ﷺ yeh mere dil ki hasrat hai Khaak ban ke Tayyabah ki kash! main bikhar jaata

Kash! aisa mil jaata ishq naam sunte hi Aankh bhi umand aati dil bhi gham se bhar jaata

Dil se ulfat-e-dunya bil-yaqeen nikal jaati Khaar un ke sahra ka dil mein gar utar jaata

Jazba-e-Ghazali do walwala-e-Bilali do Kash Murshidi jaisa mil tapan jigar jaata

Zair-e-Madinah tu chal raha hai hans hans kar Kash! le ke muztar qalb aur chashm-e-tar jaata

Be-dharak Madine mein dakhla hua tera Kash! paaon ke badle sar ke bal agar jaata

Rote rote mar jaata waqt-e-rukhsat-e-Tayyabah Kash! main Madine se laut kar na ghar jaata

Kash! furqat-e-Tayyabah se main rehta ranjeeda Har khushi ka lamha bhi rote hi guzar jaata

Kaam mera ban jaata jo teri nazar hoti Mera dooba beera bhi Ya Nabi ﷺ ubhar jaata

Laazmi hai har surat chhorna gunahon ka Bhai maut se pehle kash! tu sudhar jaata

Ghair ke tu fashion ko chhor de mere bhai Un ki sunnatein apna kyun hai dar-ba-dar jaata

Be-adad ghulam Aaqa ﷺ khuld ja rahe hain kash! Main bhi saath un ke Ya Shah-e-Bahr-o-Bar jaata

Ya Khuda! Muballigh mein sunnaton ka hota kash! Tere deen ki khidmat kuch jahan mein kar jaata

More Lyrics, Less Storage - Install the App and Ditch the Screenshots!

Un ka aa gaya Attar! un ka aa gaya Attar! Shor tha yeh har jaanib hashr mein jidhar jaata