Karun Har Aan Main Teri

کروں ہر آن میں تیری اِطاعت یارسولَ اللہ پئے مرشِد بنا دے نیک سیرت یارسولَ اللہ

اندھیری قبر ہے اور ہائے! میں بِالکل اکیلا ہوں اب آبھی جاؤ اے مہرِ رِسالت! یارسولَ اللہ

بقیعِ پاک میں سو جاؤ ں میں آرام سے اے کا ش! مُیَسَّر آئے گی یوں تیری قُربَت یارسولَ اللہ

عذابِ قبر و محشر سے بچالو نارِ دوزخ سے خدارا ساتھ لے کے جاؤ جنّت یارسولَ اللہ

جو غُصّہ نفس کی خاطر مجھے آقا کبھی آئے ملے صبر و شِکَیبائی کی دولت یارسولَ اللہ

مجھے رنج و اَلَم نے ہر طرف سے گھیر رکھا ہے دُکھی دل کو کرم سے دیدو راحت یارسولَ اللہ

عطا کردو مجھے اسلام کی تبلیغ کا جذبہ میں بس دیتا پھروں نیکی کی دعوت یارسولَ اللہ

یقینا آپ کا اِنعام ہے یہ مل گئے مجھ کو شَہَنشاہِ بریلی اعلیٰ حضرت یارسولَ اللہ

مجھے تم مَسلکِ احمدرضا پر استِقامت دو بنوں خدمت گزارِ اہلِ سنّت یارسولَ اللہ

تمہارا ہی تو یہ لُطف و کرم ہے رحمتِ عالم! ضِیاء ُالدّین مَدنی سے ہے نسبت یارسولَ اللہ

مدینے کی جُدائی میں جو بے چارے تڑپتے ہیں اِنہیں دے دو مدینے کی اجازت یارسولَ اللہ

مسلماں باز آجائیں شہا! فیشن پرستی سے کرم کردو بنیں پابندِ سُنَّت یارسولَ اللہ

مِرے وابَستگاں کی اور مِرے سارے قبیلے کی تمہِیں ! ابلیس سے کرنا حفاظت یارسولَ اللہ

عُمَر کا واسِطہ اَعدائے دیں برباد ہوجائیں ملے ہر ایک حاسِد کو ہدایت یارسولَ اللہ

شہا! اِس اجتماعِ پاک میں جتنے مسلماں ہیں ہو سب کی مغفِرت ہو سب پہ رَحمت یارسولَ اللہ

تِرا عطارؔ آنا چاہتا ہے تیرے روضے پر عطا ہو حاضِری کی پھر سعادت یارسولَ اللہ