Karun Dam Badam Main

Karun dam-ba-dam mein sana-e-Madinah Lagata rahe dil sada-e-Madinah

Khuda ki qasam! pyari pyari hai jannat Magar aashiqon ko rulaye Madinah

Jahan ke nazare hon aankhon se aujhal Nazar mein meri bas samaye Madinah

Khila de kali mere murjhaye dil ki Khudara tu aakar hawa-e-Madinah

Jise chahiye donon aalam ki daulat Woh kashkol le karke aaye Madinah

Inayat se Allah ki rehmaton ka Shab-o-roz darya bahaye Madinah

Paye peer-o-murshid tu farma de roshan Mera qalb-e-teerah ziya-e-Madinah

Shafa'at ki khairat ka jo hai talib Baraye ziyarat woh aaye Madinah

Na de Ya Ilahi! mujhe takht-e-shahi Bana de mujhe bas gada-e-Madinah

Shab-o-roz jalwe hain Mah-e-Arab ke Na kyon raat din jagmagaye Madinah

Tujhe wasta Ghous-o-Ahmad Raza ka Ata kar Ilahi qaza-e-Madinah

Baqi-e-Mubarak mein madfan ata ho Karam kar khudaya baraye Madinah

Meri khaak jis dam ude Ya Ilahi Ise kaash udaye hawa-e-Madinah

Padosi bana mujh ko jannat mein un ka Khudaye Muhammad baraye Madinah

Laga fajr mein bhai ghar ghar pe ja kar Zara dil laga kar "Sada-e-Madinah"

Jo de roz do "Dars-e-Faizan-e-Sunnat" Main deta hun us ko dua-e-Madinah

Get Lyrics On-The-Go! Download Our App Now!

Safar jo kare qafilon mein musalsal Main deta hun us ko dua-e-Madinah

Jo paband hai ijtima'aat ka bhi Main deta hun us ko dua-e-Madinah

Jo neki ki dawat ki dhoomein machaye Main deta hun us ko dua-e-Madinah

Zuban par jo "Qufl-e-Madinah" lagaye Main deta hun us ko dua-e-Madinah

Jo aankhon pe Qufl-e-Madinah lagaye Main deta hun us ko dua-e-Madinah

Jo deewane furqat mein rote hain Aaqa Dikha do unhein ab faza-e-Madinah

De soz-e-jigar chashm-e-tar qalb-e-muztar Mujhe Ya Ilahi baraye Madinah

Yeh Attar Makke se zinda salamat Tadapta hua kaash aaye Madinah