Kamal Khalaq Zaat Uski

Kamal-e-khallaq-e-zaat uski Jamal-e-hasti hayat uski Bashar nahin azmat-e-bashar hai Mira payambar azeem-tar hai

Woh sharh-e-ahkam-e-haqq-e-ta'ala Woh khud hi qanoon khud hawala Woh khud hi Quran khud hi qari Woh aap mahtab aap halah

Woh aks bhi aur aayina bhi Woh nuqta bhi khat bhi daira bhi Woh khud nazara hai khud nazar hai Mira payambar azeem-tar hai

Shaoor laya kitab laya Woh hashr tak ka nisab laya Diya bhi kamil nizam usne Aur aap hi inqalab laya

Download Lyrics & Access Offline - Install Our App Now!

Woh ilm ki aur amal ki had bhi Azal bhi us ka hai aur abad bhi Woh har zamane ka rahbar hai Mira payambar azeem-tar hai

Woh Adam-o-Nooh se zyada Buland himmat buland irada Woh zuhd-e-Isa se koson aage Jo sab ki manzil woh us ka jalwa

Har ek payambar nihan hai is mein Hujoom-e-paighambaran hai is mein Woh jis taraf hai Khuda udhar hai Mira payambar azeem-tar hai

Bas ek mashkeza ek chatai Zara se jau ek charpai Badan pe kapre bhi wajibi se Na khush-libasi na khush-qabai

Yahi hai kul-e-kainat jis ki Gini na jayen sifaat jis ki Wohi to Sultan-e-bahr-o-bar hai Mira payambar azeem-tar hai

Jo apna daaman lahoo se bhar le Musibatein apni jaan par le Jo tegh-zan se lare nihatta Jo ghalib aakar bhi sulh kar le

Aseer-o-dushman ki chah mein bhi Mukhalifon ki nigah mein bhi Ameen hai Sadiq hai motabar hai Mira payambar azeem-tar hai

Jise Shah-e-shash-jihat dekhun Use gharibon ke sath dekhun Inan-e-kon-o-makan jo tha mein Kodal par bhi woh hath dekhun

Lage jo mazdoor Shah aisa Na zar na dhan sar-e-rah aisa Falak-nasheen ka zameen pe ghar hai Mira payambar azeem-tar hai

Woh khalwaton mein bhi saf-ba-saf bhi Woh is tarah bhi woh us taraf bhi Mahaz-o-mimbar thikane us ke Woh sar-ba-sajda bhi sar-ba-kaf bhi

Kahin woh moti kahin sitara Woh jam'iyat ka ist'ara Woh subh-e-tehzeeb ka gujar hai Mira payambar azeem-tar hai