Jahan Bani Ata Kardein

Jahan-bani ata kardain bhari jannat hiba kardain Nabi mukhtar-e-kul hain jis ko jo chahein ata kardain

Jahan mein un ki chalti hai woh dam mein kya se kya kardain Zameen ko aasman kardain surayya ko sara kardain

Fiza mein udne wale yun na itrayein nida kardain Woh jab chahein jise chahein use farman-rawa kardain

Meri mushkil ko yun aasan mere mushkil-kusha kardain Har ek mauj-e-bala ko mere Maula nakhuda kardain

Munawwar meri aankhon ko mere Shams-ud-Duha kardain Ghamon ki dhoop mein woh sayah-e-zulf-e-duta kardain

Ata ho be-khudi mujh ko khudi meri hawa kardain Mujhe yun apni ulfat mein mere Maula fana kardain

Find Your Favorite Lyrics Anytime, Anywhere - Install the App Today!

Jahan mein aam paigham-e-Shah-e-Ahmad Raza kardain Palat kar peeche dekhein phir se tajdeed-e-wafa kardain

Nabi se ho jo begana use dil se juda kardain Padar, madar, baradar, maal-o-jaan un par fida kardain

Tabassum se gumaan guzre shab-e-tareek par din ka Ziya-e-rukh se deewaron ko roshan aaina kardain

Kisi ko woh hansate hain kisi ko woh rulate hain Woh yunhi aazmate hain woh ab toh faisla kardain

Gul-e-Taiba mein mil jaaun gulon mein mil ke khil jaaun Hayat-e-jaawani se mujhe yun aashna kardain

Unhein manzoor hai jab tak yeh daur-e-aazmaish hai Na chahein toh abhi woh khatm daur-e-ibtila kardain

Sag-e-awara-e-sehra se ukta si gayi duniya Bachao ab zamane ka sagan-e-Mustafa kardain

Zamana khugar-e-may hai nayi may ki zaroorat hai Pila kar apni nazron se woh tajdeed-e-nasha kardain

Mujhe kya fikr ho Akhtar mere yawar hain woh yawar Balaon ko jo meri khud giraftar-e-bala kardain

Tamanna-e-dil-e-Ashraf bas itni hai sar-e-Kausar Jab Aaqa jaam-e-Kausar dein lab-e-aqdas laga kar dein