Jaan o Dil Ya Rab Ho

جان و دِل یارب ہو قربانِ حبیبِ کبریا اور ہاتھوں میں ہو دامانِ حبیبِ کبریا

آنکھ میں ہو نورِ دَندانِ حبیبِ کبریا سر میں ہو سودا و اَرمانِ حبیبِ کبریا

اُن کے فیضِ نور نے کونین کو روشن کیا دونوں عالم پر ہے احسانِ حبیبِ کبریا

زندگی ہو یا مجھے موت آئے دونوں حال میں میں ہوں یارب اور بیابانِ حبیبِ کبریا

کیسا فخر و ناز ہو اپنے مقدر پر اگر سگ بنائیں مجھ کو دَربانِ حبیبِ کبریا

اِک نظر دیکھو جمالِ آفتابِ ہاشمی میری آنکھوں پر ہو احسانِ حبیبِ کبریا

بن کے منگتا ان کے دَر کے شاہِ عالم ہوگئے اے زہے قسمت گدایانِ حبیبِ کبریا

تار ہے گورِ غریباں وقت ہے اِمْداد کا میں فدا شمع شبستانِ حبیبِ کبریا

لٹ رہی ہے ساقیِ کوثر کے میخانہ میں مے جوش میں ہیں آج مستانِ حبیبِ کبریا

صاحب لَوْلَاک کے باعث ہوئی اِیجاد خلق ماسوی اللہ سب ہے سامانِ حبیبِ کبریا

راہِ حق میں دے کے سر قربانِ جاناں ہوگئے کیوں نہ ہوں زِندہ شہیدانِ حبیبِ کبریا

بٹتا ہے کونین میں باڑا اُسی سرکار کا ہیں زمین و آسماں خوانِ حبیبِ کبریا

عہد رب نے روزِ میثاق انبیا سے لے لیا سر پہ لیں پھر کیوں نہ فرمانِ حبیبِ کبریا

کچھ نشاں پایا نہ اب تک مہر و مہ چکر میں ہیں اس قدر اُونچا ہے ایوانِ حبیبِ کبریا

اپنی اُمت میں کیا اپنی جماعت میں لیا تجھ پہ جاں قربان احسانِ حبیبِ کبریا

کون ہے جو اُن کے خوانِ فضل سے محروم ہے ہیں خلیلِ حق بھی مہمانِ حبیبِ کبریا

جس کے بلبل ہیں ابوبکر و عمر عثماں علی رشکِ جنت ہے وہ بستانِ حبیبِ کبریا

غارِ تیرہ میں جو کاٹا سانپ نے پروا نہ کی آفریں اے جاں نثارانِ حبیبِ کبریا

خوابِ مولیٰ پر نمازِ عصر کو قرباں کیا ایسے ہوتے ہیں فدایانِ حبیبِ کبریا

ہم سیہ کاروں کی بخشش کی کوئی صورت نہیں جز ترے اے چشم گریانِ حبیبِ کبریا

عقل عالم کی رَسائی اُن کے رتبے تک محال ہاں خدا سے پوچھئے شانِ حبیبِ کبریا

تجھ سے کب ممکن ہے مِدحت اے جمیلؔ قادری بس خدا خود ہے ثنا خوانِ حبیبِ کبریا

فیض مرشد ہے جمیلؔ قادری تم پر کہ سب تم کو کہتے ہیں ثنا خوانِ حبیب کبریا a