Iss Tarah Tu Ne Har Insaan

Is tarah tu ne har insaan se mohabbat ki thi Adamiyat ne tere haath pe bai'at ki thi

Waqt ke aakhri lamhay bhi kharay thay peechay Sahar-o-shaam ki jab tu ne imamat ki thi

Parwarish paayi thi tehzeeb ne aangan mein tere Tere bachpan ne bhi ustadi-e-hikmat ki thi

Har payambar tere saaye mein lipat kar aaya Teri aawaz ne takmeel-e-haqeeqat ki thi

Tere ik saans ki qeemat bhi koi kya de ga Tahi dasti mein bhi shaahon ki kafalat ki thi

Dekh leta tha pas-e-pusht bhi aagay ki tarah Tujh ko Khaliq ne woh beenayi-o-dali'at ki thi

Us ka ik rukh hi ata kar meri be-sabri ko Tu ne har haal mein jis tarah qana'at ki thi

Koi bhi aaina kya is ke muqabil thehray Saadgi ne teri, aaraish-e-ummat ki thi

No Internet? No Problem! Get the App for Offline Lyrics!

Kaash usi tarah Muzaffar teri taqleed karay Jis tarah teri sahaba ne ita'at ki thi