Ik Baar Phir Madine

Ek baar phir Madine Attar ja rahe hain Aaqa Madine wale dar par bula rahe hain

Qismat ko us tasawwur se wajd aa rahe hain Rahmat ki bheek dene Aaqa bula rahe hain

Woh faiz ka khazana har dam luta rahe hain Anwar har taraf hi Taibah mein chha rahe hain

Jo koi unke gham mein aansu baha rahe hain Jine ka lutf aise ush-shaq pa rahe hain

Jis dam Madine aayein royein pachharein khayein Hum maang tum se Aaqa aisi ada rahe hain

Husn-e-amal hamare palle mein kuch nahi hai Aahon ki aansuon ki soghat la rahe hain

Manzar hai rooh parwar rauzay ki jaliyon par Ush-shaq aansuon ke moti luta rahe hain

Aaqa ye hain ye aankhein bas aap hi ke gham mein Haaye hamein zamane ke gham rula rahe hain

Izn-e-Khuda se ho tum mukhtar-e-har do-aalam Dono jahan tumhari khairaat kha rahe hain

Dastoor hai ke jis ka khana usi ka gana Hum jis ka kha rahe hain geet us ke ga rahe hain

Maskan bane Madinah madfan bane Madinah Ahmed Raza ka tum ko de wasita rahe hain

Aaqa! bulao un ko be-chain muztarib jo Dil ko jala rahe hain aansu baha rahe hain

Jin ka na bhau koi duniya mein poochta ho Seenay se un ko Aaqa apne laga rahe hain

Ummat ke haal se hain aagah har ghari aap Khwabon mein aa rahe hain bigri bana rahe hain

Duniya ke gham ne mara Lillah do sahara Sarkar thokarrein hum dar dar ki kha rahe hain

Ab ghir chuki hai Aaqa toofan mein apni naiya Aye nakhuda sahara maang aap ka rahe hain

Aaqa huzur-e-anwar! nazar-e-karam ho hum par Abr-e-siyah dil par isiyan ke chha rahe hain

Chashm-e-karam ho jana su-e-gunah-garan Sarkar! nafs-o-shaitan har dam daba rahe hain

Un sab muballighon ke khwabon mein ab karam ho Aaqa jo sunnaton ki khidmat baja rahe hain

Parwardigar-e-aali de jazba-e-Ghazali Kar hum ko khush khisali kar yeh dua rahe hain

Bemari-e-gunah se hum ko shifa de ya Rabb Ban jayein nek hum sab kar iltija rahe hain

Daulat ki hirs dil se Allah door kar de Ishq-e-Rasool de de kar yeh dua rahe hain

Takseer-e-maal-o-zar ki hargiz nahi tamanna Hum maang aap se bas gham aap ka rahe hain

Rukhsat ki ab ghari hai sar par ajal khari hai Aajao ab Khudara hum jaan se ja rahe hain

Download Lyrics & Access Offline - Install Our App Now!

Ab lahad mein azizo! jaldi utaar bhi do Aaha! woh muskuraate tashreef la rahe hain

Faryad jaan-e-aalam! koi nahi hai hamdam Su-e-saqar farishtay ab le ke ja rahe hain

Qurban roz-e-mahshar daaman ka parda dhak kar Aibon ko mere sarwar khud hi chhupa rahe hain

Mahshar mein banda parwar lutf-o-karam ke paikar Bhar bhar ke jaam-e-Kausar hum ko pila rahe hain

Sadqe mein Murtaza ke soz-e-Bilal de do Yeh arz le kar Aaqa Attar aa rahe hain

Un ke karam ke sadqe! fazl-o-karam pe qurban Attar ko woh lekar jannat mein ja rahe hain