Ik Baar Phir Karam

Ik baar phir karam Shah-e-Khairul-Anam ho Phir janib-e-Madinah rawanah ghulam ho

Phir jhoomta hua main chaloon janib-e-Hijaz Makkay mein subah ho toh Madinay mein sham ho

Pesh-e-nazar ho Gumbad-e-Khazra ki phir bahar Ae kash! phir Madinay mein mera qayam ho

Ho aana jana mera Madinay mein umr bhar Aakhir mein zindagi ka wahin ikhtitam ho

Yun mujh ko maut aaye tumharay dayar mein Chaukhat pe sar ho lab pe durood-o-salam ho

Ya Rab bacha le tu mujhe naar-e-jaheem se Aulad par bhi balkay jahannam haram ho

Dewanay ro rahay hain Madinay ke wastay Unki bhi hazri ka koi intezam ho

Dil ki murad pa gaya jo dar pe aa gaya Koi sabab nahin ke na mangtay ka kaam ho

Dushman ka zor barh chala hai Ya Ali madad Ab Zulfiqar-e-Haidari phir be-niyam ho

Be-kaar guftagu se meri jaan chhoot jaye Har waqt kash! lab pe durood-o-salam ho

Ho jayen khatm kash! gunahon ki aadatein Aisa karam ae Sayyid-e-Khairul-Anam ho

Ahmed Raza ka sadqah musalman naik hon Naiki ki dawat Aaqa jahan bhar mein aam ho

Aaqa! gham-e-Madinah mein rona naseeb ho Zikr-e-Madinah lab pe meray subah-o-sham ho

No Internet? No Problem! Get the App for Offline Lyrics!

Ho rooh teray qadmon pe Attar ki nisar Jis waqt is ki umr ka labrez jaam ho