Hum Khak Hain Aur Khak Hi

Hum khaak hain aur khaak hi mawa hai hamara Khaki to woh Aadam-e-jadd-e-aala hai hamara

Allah hamain khaak kare apni talab mein Yeh khaak to Sarkar se tamgha hai hamara

Jis khaak pe rakhte thay qadam Sayyid-e-Aalam Us khaak pe qurbaan dil-e-shaida hai hamara

Kham ho gayi pusht-e-falak is ta'n-e-zameen se Sun hum pe Madinah hai woh rutba hai hamara

Download Lyrics & Access Offline - Install Our App Now!

Is ne laqab-e-khaak Shahanshah se paya Jo Haidar-e-Karrar ke maula hai hamara

Aye mudda'io! khaak ko tum khaak na samjhe Is khaak mein madfoon Shah-e-Batha hai hamara

Hai khaak se tameer mazar-e-Shah-e-Konain Ma'moor isi khaak se Qibla hai hamara

Hum khaak urayain ge jo woh khaak na payi Aabad Razaؔ jis pe Madinah hai hamara